Kualifikimi për në “Francë 2016” bën që Shqipëria të marrë masa për pjesëmarrjen në një kompeticion të tillë. Një nga risitë e para është edhe afrimi i një ish-drejtuesi të mediave më të mëdha italiane në krye të zyrës për shtyp, Giancarlo Padovan. Burime të besueshme për gazetën “Panorama Sport” në institucionin e futbollit në vend, që kanë preferuar të ruajnë anonimatin, kanë bërë me dije se afrimi i Padovanit pritet që të realizohet brenda këtij muaji.
Detyra e tij kryesore do të ketë lidhje me imazhin e Shqipërisë, sidomos gjatë Europianit. Gazetari dhe ish-drejtuesi i mediave të ndryshme italiane do të marrë rolin e drejtuesit sa u përket PR (Marrëdhënieve më Publikun). Një sektor shumë i rëndë- sishëm që ka të bëjë me marrëdhëniet me mediat dhe me imazhin e vetë institucionit. Aktualisht në zyrën e shtypit në Federatën Shqiptare të Futbollit janë tre persona, që do të ruajnë pozicionet e tyre edhe pas afrimit të Padovanit.
Karriera
Që nga viti 1989, për rreth 13 vite, Padovan ka qenë pjesë e të përditshmes prestigjioze “Corriere Della Sera”, duke u bërë një nga gazetarët më të rëndësishëm në shtetin fqinj. Pavarësisht se kjo është gazeta në të cilën ai ka qëndruar shumë gjatë, Padovan e ka nisur karrierën në këtë profesion me “La Repubblica”, ku edhe ka mbuluar postin e zëvendësit në sektorin e sportit. 2002-’08 është periudha gjatë të cilës Padovan ka drejtuar të përditshmen torineze “Tuttosport”. Në vitin 2009, ai është bërë gazetari i parë që u përfshi në Këshillin Federal në Federatën Italiane të Futbollit. Padovan e njeh realitetin sportiv shqiptar pasi ka qenë pjesë e “Agon Channel”.
Trajner
Giancarlo Padovan ka qenë edhe trajner në futbollin e femrave. Ai ka drejtuar skuadrat për femra të Fiamamonzas, Piemontes dhe Torinos (2005- ’08), me të cilën është renditur në vendin e dytë dhe ka arritur deri në finalen e Kupës së Italisë.
PANORAMA SPORT
