Kryeministri Edi Rama ka publikuar këtë të martë qëndrimin e regjisorit të njohur dhe drejtuesin e katedrës së artit skenik në Institutin e Lartë të Arteve, Gëzim Kame i cili shprehet pro ndërtimit të Teatrit të ri Kombëtar.
“Unë jam dëshmitar i dy kohëve, edhe para 20 viteve i njëjti problem ka qenë. Atëherë u tha që kjo godinë do shembet se nuk e mban zjarrin, do të digjet shpejt, po të njëjtat gjëra.
Kreu i aktorëve, Kadri Roshi thoshte: Aman more na bëni një teatër të ri! Ishte ëndërr e të gjithë aktorëve sepse që në ’46 ka qenë si barakë. Ne shqiptarët kemi fatin që po bëjmë gjëra të reja këtë periudhë dhe po marrim maksimumin e vlerës së Europës.
Në asnjë mënyrë të mos pengohet ndërtimi i një teatri të ri në atë vend ku është teatri ekzistues”,shprehet regjisori Kame.
Rama thotë se opinioni i tij për ngrehinën ekzistuese të teatrit është ai që ka qenë denbabaden.
“Gëzim Kame, regjisor i njohur i teatrit, pedagog e drejtues i katedrës së artit skenik në Institutin e Lartë të Arteve, ku u formua gjenerata e aktorëve të viteve të diktaturës, ka vënë në skenën e Teatrit Kombëtar drama e komedi, shumë të duartrokitura nga publiku.
Opinioni i tij për ngrehinën ekzistuese të teatrit është ai që ka qenë denbabaden”, thekson kryeministri.
/a.r
