Një vajzë tre vjeçare pothuajse ka gjetur vdekjen, pasi një gërvishtje nga kotelja që mbanin në shtëpi, ka çuar në zhvillimin e sindromës vdekjeprurëse të shokut toksik.
Sipas Daily Mail, vogëlushja Lilanna po luante me macen, kur u gërvisht në qafë, megjithatë nëna e saj Kelly, 35 vjeç, fillimisht nuk u shqetësua shumë.
Por brenda disa orësh Lilanna nga Taunton, Somerset, po ankohej për dhimbje. Prindërit nxituan në spital ku ajo humbi ndjenjat, ndërsa lëkura iu irritua dhe kishte vazhdimisht të vjella.
Nëna e saj tha: “Kisha shumë pak informacion rreth sindromës së shokut toksik. Kisha lexuar për të vetëm në kutitë ambalazhuese të tamponëve. Për fat të mirë, mjekja jonë e kishte trajtuar një pacient të tillë më përpara, kështu që ajo e dalloi menjëherë atë çfarë po i ndodhte sime bije”.
Çfarë është sindroma e shokut toksik?
Sindromi i shokut toksik është një gjendje e rrallë, por serioze, e shkaktuar nga një infeksion bakterial. Ajo ndodh kur bakteri Staphylococcus Aureus futet në gjak dhe prodhon toksina.
Megjithëse sindromi i shokut toksik ka qenë i lidhur me përdorimin e tamponit nga gratë gjatë ciklit menstrual, kjo gjendje mund të prekë edhe burrat, fëmijët dhe njerëzit e të gjitha moshave.
Simptomat e shokut toksik mund të ndryshojnë nga një njeri tek tjetri, por në shumicën e rasteve ato shfaqen papritur. Shenjat më të zakonshme që ndodhin kur dikush është i prekur nga kjo sindromë janë: ethet, dhimbje të kokës, presion i ulët i gjakut, dhimbje të muskujve, diarre, të vjella, skuqje e syve, gojës dhe fytit etj.
Infeksioni zakonisht ndodh kur bakteret hyjnë në trupin tuaj nëpërmjet një plage, siç është prerja, por edhe plagë të tjera.
Ekspertët nuk janë të sigurtë pse përdorimi i tamponit ndonjëherë sjell këtë gjendje. Disa besojnë se një tampon i lënë në vend për një kohë të gjatë tërheq bakteret. Një mundësi tjetër është që fibrat tampon gërvishtin vaginën, duke krijuar një rrugë për bakteret për të hyrë në qarkullimin e gjakut.
a.ç
