Lidhur me tragjedinë e 21 Janarit dhe situatën e tensionuar në Shqipëri duket se ka reaguar edhe manjati George Soros. Është prestigjiozja amerikane “Washington Post”, e cila ka bërë publike disa nga e-mailet e ish-sekretares amerikane të Shtetit Hillary Clinton, ku përmendet edhe Shqipëria.
Bëhet fjalë për një email që Clinton, nëpërmjet këshilltarëve të saj, ka marrë Soros, më 23 Janar 2011, vetëm dy ditë pas demonstratës së 21 Janarit në Tiranë. Sipas “Washington Post”, ky e-mail provon lidhjet e forta të Clinton me donatorët e fushatës së saj.
Në këtë email, Soros bën një pasqyrë të asaj çfarë ka ndodhur në Tiranë dhe kërkon ndërhyrjen e Shteteve të Bashkuara të Amerikës dhe të Bashkimit Europian për të stabilizuar situatën në Shqipëri, pasi siç shkruan ai, “situata është shumë e tensionuar”.
Soros propozon që t’i bëhet thirrje e menjëhershme Kryeministrit Sali Berisha dhe kreut të opozitës në atë kohë Edi Rama, që të ndalin protestat e ardhshme dhe të tërhiqen nga deklaratat që nxisin revoltë. Ndërsa pika e dytë, e cila sipas tij duhet të bëhet në mënyrë urgjente, është caktimi i një ndërmjetësi ndërkombëtar nga SHBA-ja dhe BE-ja, për të ulur në tryezë dy partitë. Ai propozon tre emra, që sipas tij janë më të përshtatshëm për këtë funksion.
Në SHBA prej muajsh janë bërë publike e-maile të Clinton në kohën që ajo ka qenë Sekretare Shteti. Madje, ajo është akuzuar për mos përdorimin e email-it zyrtar. Kjo çështje u bë edhe më e debatueshme kur zonja Clinton priste që të shpallte kandidaturën e saj për presidente brenda radhëve të demokratëve, e cila deri më tani është edhe emri më i favorizuar në radhët e partisë së Presidentit Obama.
