Projekti TAP (Trans Adriatic Pipeline) do të përfundojë në 2020-n, ku do të transportohet edhe gazi i parë nga fushat e Shah Deniz II.
Ndërkohë që aktualisht në Trans Adriatik(Greqi, Shqipëri e Itali) kanë përfunduar më shumë se 50% e punimeve totale, 16 muaj pas nisjes së zbatimit të projektit, shkruan Koha Ditore.Këtë fakt e ka bërë të ditur të enjten drejtori menaxhues i TAP-it, Luca Schieppati.“Jemi të lumtur që TAP vazhdon të progresojë në kohë dhe brenda buxhetit.
Prandaj ne mbetemi në rrugën e duhur për të transportuar gazin e parë nga Shah Deniz II në vitin 2020, duke sjellë një burim të ri energjie kaq të nevojshëm në rrjetin evropian të energjisë”, u shpreh drejtori Schieppati.
Deri më sot në këtë projekt ekipet e TAP-it në Shqipëri, Greqi dhe Itali kanë investuar mbi 16 milionë orë pune dhe kanë përshkuar afërsisht 43 milionë kilometra, pa asnjë incident madhor. (b.an)
