Drejtoresha e re e RTSH-së, Eni Vasili, pranon për BIRN se kompania po përballet me një situatë të rëndë financiare – pasi disa kontribuues zbuluan se nuk janë paguar prej muajsh.
Nga Fjori Sinoruka
Pasi dy kontribuues të transmetuesit publik të Shqipërisë kritikuan vonesat në pagesa dhe mungesën e informacionit – dhe pasi të tjerë konfirmuan për BIRN se përballen me të njëjtin problem – Eni Vasili, drejtoresha e re e RTSH-së që nga 9 prilli, pranoi për BIRN se ekziston një “situatë katastrofike borxhesh dhe detyrimesh”.
Ajo tha se menaxhmenti i ri “po bën më të mirën për të menaxhuar situatën”.
“Falenderoj të gjithë gazetarët, autorët dhe moderatorët e projekteve të mars-qershorit 2025 për mirëkuptimin lidhur me vonesat në pagesat e RTSH-së. Sigurisht, nuk është përgjegjësia e tyre që iu premtuan projekte që nuk mund të paguheshin, por kjo nuk e bën menaxhmentin e ri përgjegjës, i cili është përballur me një situatë katastrofike borxhesh dhe detyrimesh dhe po përpiqet të bëjë më të mirën për ta menaxhuar atë”, tha Vasili për BIRN.
Ajo shtoi se aktualisht ka një “prioritizim të pagesave”, pasi detyrime të rëndësishme i detyrohen Unionit Evropian të Transmetimeve, EBU, lidhur me festivalin e Eurovizionit.
“Sigurisht, ka një prioritizim të pagesave në këtë moment dhe po përpiqemi të shlyejmë disa detyrime ndërkombëtare fillimisht, disa prej të cilave nuk janë paguar që nga janari 2024. Mosshlyerja e tyre do ta vendoste RTSH-në në rrezik për të humbur partneritetin me EBU-në dhe pjesëmarrjen në Eurovizion, apo humbjen e shumë të drejtave televizive”, tha Vasili për BIRN.
“Ajo do të përballej gjithashtu me gjykata ndërkombëtare për mospagesën e kontratave me të huajt”, shtoi ajo.
Vasili theksoi gjithashtu se Bordi i Administrimit* ka marrë në shqyrtim edhe borxhin e brendshëm dhe disa formula të rinegocimit të tij nga sektori i financës dhe së shpejti pritet të dalë me një vendim.
“Të qenurit drejtues i një institucioni me kaq probleme të mbartura nuk justifikon gjithsesi prodhuesit e baltës t’i lëshojnë ato në mënyrë dashakeqe mbi kurrizin e atyre pak njerëzve qe nuk kanë asnjë përgjegjësi për krijimin e kësaj situate,” tha Vasili.
Në prill, Vasili mori detyrën si drejtoreshë e përgjithshme e transmetuesit publik shqiptar, i cili gjendet në kushte të rënda financiare dhe i ngarkuar me procese gjyqësore që burojnë nga pushimi i menjëhershëm i rreth 150 punonjësve nga paraardhësi i saj, ish-politikani Alfred Peza.
Sipas Këshillit Drejtues, transmetuesi ka një borxh prej 6 milionë eurosh dhe vetëm çështjet e pushimeve të padrejta nga vala e shkarkimeve e Pezës i kanë kushtuar deri më tani 1.8 milionë euro.
Në teori, transmetuesi është politikisht i pavarur, por Këshilli Drejtues zgjidhet nga parlamenti, i cili dominohet nga Partia Socialiste në pushtet, ndërsa Drejtori i Përgjithshëm zgjidhet nga bordi. Peza ishte një ish-deputet i Partisë Socialiste.
*Shkrimi u amendua për të korrigjuar një version të mëparshëm ku Këshilli Drejtues citohej gabimisht në vend të Bordit të Administrimit.
