Gazeta greke “Ekathimerini” shkruan për vdekjen e shqiptarit Pëllumb Marnikollaj, ngjarje e cila sipas tyre kërcënon të tendosë marrëdhëniet mes dy vendeve, pas apelit të krerëve të shtetit shqiptar, Presidentit Nishani e kryeministrit Rama, për hetim të plotë nga autoritetet greke. “Vdekja e një shtetasi shqiptar në një stacion policie në Athinë në fillim të këtij muaji po kërcënon tendosje të marrëdhënieve dypalëshe, me kryeministrin e Shqipërisë Edi Rama dhe me Presidentin Bujar Nishani, pas thirrjeve të tyre për hetim të plotë nga autoritetet greke”, shkruan gazeta.
Më tej, sipas Balkanweb, gazeta i referohet të dhënave të policisë greke, ku sqarohet se i riu është hedhur nga dritarja e rajonit të policisë, si dhe autopsisë së bërë në shtetin fqinj, e cila sipas “Ekathimerini”, tregoi se i riu nuk është torturuar.
“Sipas autoriteteve policore greke, 29 vjeçari Pëllumb Marnikollaj, i idënuar me tetë vjet burg për akuzën e grabitje, u hodh nga dritarja në një stacion policie, kur iu komunikua se mund të përballej me akuza të reja. Por të afërmit e viktimës dhe mediat, duke iu referuar raporteve të policisë, flasin torturim dhe vrasje të Marnikollajt, ndërsa kërkojnë nga autoritetet e tyre të sigurohen për një hetim të plotë në lidhje me këtë rast. Avokati grek i kontaktuar nga vëllai i viktimës, vërtetoi se raporti i autopsisë mbi trupin e viktimës nuk tregon shenja dhune dhe torture, por të afërmit janë të bindur se ka pasur dhunë e torturë dhe po kërkojnë kryerjen e një autopsie të re”, theksohet më tej në shkrim.
I riu nga Lezha ndërroi jetë në rrethana ende të pasqaruara zyrtarisht më 3 gusht të këtij viti, pak kohë pasi ishte kërkuar të shkonte për sqarime në rajonin e policisë në lagjen “Ano Patisia” të kryeqytetit grek. Familjarët dhe miqtë e tij u njoftuan nga policia se i riu ishte hedhur nga kati i tretë, e më pas trupi i tij ishte mbajtur në frigorifer në një spital të Athinës, si dhe në një varrezë publike, aty ku edhe e gjetën pas 10 ditësh kërkime. Nisur nga pamja makabre mbi trup, ku ata dalluan shenja dhune, familjarët iu drejtuan Policisë së Lezhës, duke bërë aty kallëzim penal për vrasjen e njeriut të tyre, në ambientet e policisë greke.
