Një operacion i policisë së Fierit i koduar “Paketimi”, ka goditur një rast të shitjes së lëndëve narkotike, duke vënë në pranga një person.
Pas informacioneve të marra në rrugë operative, u bë arrestimi i K. C., 41 vjeç, banues në Lushnjë.
Si rezultat i operacionit, në lagjen “Kadri Qystri” Lushnjë, shërbimet e policisë kapën në flagrancë 41-vjeçarin, i cili do t’i shiste lëndën narkotike të bërë gati në doza, shtetasit T. Dh.
Gjithashtu u procedua penalisht në gjendje të lirë shtetasi T. Dh., 53 vjeç, banues në Lushnjë, i cili dyshohet se do të blinte lëndën narkotike.
Gjatë kontrollit në banesën e shtetasit K. C., u gjet dhe sekuestrua sasia e lëndës narkotike 865 gramë kanabis sativa, një pjesë e së cilës ishte e ndarë në 114 doza, gati për shitje.
Gjithashtu u sekuestruan në cilësinë e provës materiale një peshore elektronike që shërbente për të bërë gati në doza të vogla lëndën narkotike, një aparat celular dhe një sasi parash.
Ndaj të dyshuarit hetimet janë në vijim, ndërkohë që materialet iu referuan Prokurorisë së Lushnjës, për veprat penale “Prodhimi dhe shitja e narkotikëve” dhe “Nxitja për përdorimin e drogës”.
g.kosovari
