Është krijuar Komisioni që do të vlerësojë aplikantët për Kreun e Byrosë Kombëtare të Hetimit (BKH). Ky komisioni vlerësimi do të kryesohet nga kreu i SPAK, Arben Kraj, ndërsa dy pjesëtarët e tjerë janë, Eneid Nakuci e Behar Dibra.
Burime për Report Tv bëjnë me dije se në se në SPAK për kreun e BKH ka kandiduar edhe kreu i task forcës në Policinë e Shtetit, Artan Shkëmbi. Ky i fundit ka drejtuar edhe operacionin ‘Forca e Ligjit’.
Mes kandidatëve për kreun e BKH janë edhe 3 shqiptarë që jetojnë në Amerikë. Deri tashmë ku jemi një java para mbylljes së aplikimeve, janë katër kandidatë që pretendojnë zgjedhjen në krye të BKH.
Ambasada e Shteteve të Bashkuara pak ditë më parë u ka bërë thirrje punonjësve të Policisë e prokurorëve që të aplikojnë për të qenë pjesë e strukturës së Byrosë Kombëtare të Hetimit. Kjo thirrje ka ardhur në ditën e nisjes së aplikimeve për 60 vendet e hetuesve që do të jenë pjesë të BKH-së.
Shtetet e Bashkuara kanë qenë ndër mbështetësit kryesor të ngritjes së institucioneve të reja të drejtësisë. Po kështu grupi i 60 hetuesve të BKH do të trajnohen në akademinë e FBI-së në Virxhinia të Shteteve të Bashkuara. Kjo strukturë është quajtur ndryshe edhe si FBI-ja shqiptare. /shqiptarja.com/
