Lewis Hamilton fiton Çmimin e Madh të Japonisë duke prekur me një dorë titullin, pas tërheqjes së rivalit të tij Sebastian Vettel, pak metra pas startit.
Tërheqja që në fillim e Sebastian Vettel sërish për një problem në motorin Ferrari ishte një asist për britanikun, i cili çon në 59 pikë diferencën me gjermanin, kur kanë mbetur edhe 4 gara nga fundi i këtij sezoni.
Edhe pse qëndroi gjatë gjithë kohës në një distancë prej 3 sekondash me kryesuesin, Maks Verstappen nuk e pati mundësinë që të sulmonte Hamilton apo t’i vinte në rrezik vendin e parë, ndërkohë që pas tyre piloti tjetër i Red Bull, Daniel Riccardo arriti të mbaj pas Valteri Botas dhe të ngjitet në vendin e tretë për të lënë finlandezin e Mercedes në të katërtin.
Pas tyre në vendin e pestë u rendit Ferrari i vetëm që zhvilloi garë, ai i Kimi Raikonen, i cili ishte nisur nga vendi i 11-të për shkak të penalizimit për ndryshimin e kambios.
Pas kësaj gare Formula 1 do të rikthehet pas dy javësh, në kontinentin amerikan, me Çmimin e Madh të Austin. /b.d
