Garancite për punësimin e Lul Berishës, flet për herë të parë Vangjush Dako

“Ështe nje pune vullnetare, nuk eshte pune me pagese. Nuk ka ardhur ende refereimi nga gjykata. Kemi mbajtur qendrim korrekt si me te gjithe te burgosurit. Lul Berisha do te angazhohet ne nje nga ndermjarrjet e Bashkise si vullnetar. Bashkia ka perdorur procedura standarte si per te gjithe te burgosurit”, tha ai.

Nje dite me pare reagoi Bashkia e Durresit për News 24 dhe BalkanWeb duke thene se Lulzim Berisha ashtu si të dënuar të tjerë, me qëllim që të fitonte liri me kusht kanë plotësuar një formular tip, i cili përfshin punë vullnetare në komunitet. Ky formular, sipas burimeve të Bashkisë së Durrësit ofrohet në të gjitha bashkitë e vendit.

BIRN mësoi sot se, treshja e gjyqtarëve të Apelit është bazuar tek raportet pozitive të administratës së burgjeve si dhe një karakteristikë familje të lëshuar nga kryebashkiaku i Durrësit, Vangjush Dako më 8 korrik 2016.

“Bashkia Durrës, duke vlerësuar gjendjen e kësaj familjeje, sjelljen e tyre në komunitet, si dhe mundësinë e lirimit të të dënuarit, garanton punësimin e të dënuarit Lulzim Berisha, në pamundësi për t’u punësuar në ndonjë subjekt privat,” citohet shkresa e Dakos në vendimin e lirimit.

Më pas, gjyqtarët argumentojnë se “pozitiv vlerësohet fakti se aktualisht kërkuesi Lulzim Berisha ka një mundësi punësimi të garantuar nga Bashkia Durrës”.

Në vendimin e saj, Gjykata e Apelit ka marrë gjithashtu vlerësimin se Lulzim Berisha “shfaq një gjendje shumë të rënduar psikologjike për shkak të kohës së gjatë të dënimit të vuajtur”, pendesën e tij për krimet dhe faktin se dy prindërit e tij janë të sëmurë rëndë dhe jetojnë vetëm.

Ky vendim solli sot reagime të ambasadorit amerikan, Donald Lu, i cili tha se lirimi Berishës ishte i papranueshëm dhe duhet të na indinjojë. Kambanë alarmi e cilësoi nga ana tjetër edhe ministri i Brendshëm, Saimir Tahiri.