Emra të njohur në botën akademike, pedagogë të brendshëm, dekanë e ish-dekanë kanë marrë përsipër të garojnë në zgjedhjet e 20 prillit për të drejtuar gjashtë fakultetet e Universitetit të Tiranës.
Pas zbardhjes së emrave që do të kandidojnë për rektorë të UT-së, tashmë është radha e dekanëve, të cilët sot pritet të depozitojnë kërkesën pranë Komisionit Zgjedhor të Fakulteteve përkatëse.
“Panorama” ka mësuar emrat e tyre, të cilët i paraqesim në një listë (tabela ngjitur), e cila nuk është e mbyllur. Kandidatura të tjera priten të depozitohen gjatë javës në vijim. Paralelisht, ata që tashmë e kanë ndarë mendjen kanë nisur fushatën për të siguruar më tepër vota nga kolegët e tyre pedagogë e studentët në zgjedhjet e pas disa javëve.
KANDIDATËT
Gara më e fortë duket se do të jetë te Histori- Filologjia, ku dy pedagoge prej vitesh në këtë fakultet përballen për kryesimin e tij.
Pedagogia e Historisë, aktualisht zëvendësdekane, Valentina Duka, tenton të marrë postin e Shezai Rrokajt, i cili nuk mund të rikandidojë më, pasi ka ezauruar numrin e mandateve.
Përballë saj është shefja e departamentit të Letërsisë, Dhurata Shehri.
Te fakulteti i Ekonomisë, dekani aktual, Sulo Hadëri, kandidat për rektor, me shumë gjasë do t’i lërë vendin rektorit Dhori Kule. Nëse fiton garën, për të cilën ende nuk ka një kandidat zyrtar e as të përfolur, Kule zbret në postin që e ka mbajtur edhe më herët për gati dhjetë vjet.
Fakulteti i Shkencave Sociale sjell surpriza në këtë garë. Edmond Dragoti, shef i departamentit të Psikologjisë, dhe profesori Aleksandër Koçani ishin dy emrat e përfolur, ndërsa përpara pak ditësh ky i fundit ka hequr dorë nga kandidimi, duke i lënë Dragotit fitoren thuajse të sigurt, pasi ende askush tjetër nuk ka dalë deri më tani të përballet me të.
Te Drejtësia, dekani aktual, Altin Shengani, do të tentojë drejt një mandati të dytë. Por nuk do ta ketë aq të lehtë fitoren përballë profesorit të njohur Artan Hoxha, njëherësh pjesë e grupit të ekspertëve për Reformën në Drejtësi. Në fakultetin e Shkencave të Natyrës, duke qenë se dekani Mynyr Koni kandidon zyrtarisht për rektor, mësohet t’i jetë lënë vend zëvendësit të tij, Endri Xhina, përballë shefit të departamentit të Kimisë, Spiro Drushku.
Te Gjuhët e Huaja ka informacione se do të garojnë më shumë se dy persona. Emrat që deri më tani konfirmohet se do të paraqesin kandidaturën sot pranë KZF-së janë Esmeralda Nushi Kromidha, shefe e departamentit të Gjuhës Frënge, dhe kolegu i saj, shef i departamentit të Gjuhës Italiane, Artur Sula.
Tashmë Universiteti i Tiranës ka konstitucionalizuar dy komisionet, atë institucional dhe të fakulteteve, përgjegjëse për organizimin e zgjedhjeve të drejtuesve të rinj. Panorama.al
