Partia Demokratike ka vendosur të thërrasë mbledhjen e kryesisë në orën 19:00 ku do të verifikohet plotësimi i kritereve nga pesë kandidatët që janë në garë si dhe do të ngrihet Komisioni i Organizimit dhe Kontrollit të Operacioneve Elektorale.
Burime nga selia blu bëjnë të ditur se mbledhjen do ta drejtojnë dy nënkryetarët, Edmond Spaho dhe Edi Paloka, të cilët kanë marrë drejtimin e partisë pas ‘ngrirjes’ së funksioneve nga Lulzim Basha.
Pika e dytë e rendit të ditës pritet të jetë Komisioni i Organizimit dhe Kontrollit të Operacioneve Elektorale.
Në këtë strukturë të kandidatët, sipas negociatave, do të kenë përfaqësuesit e tyre për të organizuar dhe monitoruar procesin.
Sipas nenit 46 të statutit të Partisë Demokratike, Komisioni i Organizimit përbëhet nga 7 anëtarë dhe 2 ndihmësa.
“1- Kryesia zgjedh një Komision të Organizimit dhe Kontrollit të Operacioneve Elektorale, të përbërë nga shtatë anëtarë titullarë dhe dy ndihmësa.
2- Komisioni ka autoritetin për përgatitjen dhe organizimin e operacioneve të votimit në nivel kombëtar e territorial dhe siguron rregullsinë e tyre. Ai ndërhyn në zgjidhjen e çështjeve elektorale në degët e partisë në përputhje me aktet e nxjerra për këtë qëllim. Ai përgjigjet përpara Kryesisë së Partisë”, thuhet në statutin e PD-së.
Mbledhja e kryesisë pritet të ketë debate për shkak se disa prej anëtarëve të saj, janë firmëtarë në kërkesën për dorëheqjen e Bashës.
Në kryesi është gjithashtu edhe Arben Ristani, sekretari i Përgjithshëm, i cili ka dhënë alarmin për shkeljen e statutit në përgatitjen e zgjedhjeve.
Gjithashtu anëtarë janë edhe Valbona Mezini, Sherefedin Shehu, Endira Bushati, Tomorr Alizoti, Arben Skënderi, por edhe Majlinda Bregu e Genc Ruli, që kanë shpërthyer me deklarata kundër Bashës.
a.ç
