Gara në listën e hapur të PS në Tiranë, ja kush janë 5 gratë socialiste që luftojnë për 1 mandat

Me përfundimin e numërimit të votave nga diaspora, e cila nuk solli ndonjë ndryshim në ndarjen përfundimtare të mandateve, vëmendja politike është zhvendosur tërësisht te lista e hapur – e vetmja që ende mund të lëvizë balancat brenda partive. Tërmeti elektoral këtë herë nuk vjen nga partitë, por nga individët.

Në kampin e PD-së, gara për mandatin e 13-të në Tiranë është kthyer në një duel të fortë dhe emocional mes Ilir Alimehmetit dhe Jorida Tabakut. Deputetja ka kaluar në avantazh me një diferencë prej 300 votash, ndërsa rezultati përfundimtar pritet me ankth. Alimehmeti, i përjashtuar nga lista e sigurt nga Berisha, ka marrë mbështetje të gjerë qytetare, ndërsa Tabaku përfaqëson një prej figurave më të vjetra dhe të respektuara brenda PD-së zyrtare.

Nga ana tjetër, Partia Socialiste përballet me një betejë të brendshme po aq të ashpër, por më pak publike. Në Tiranë, PS ka futur deri më tani 7 kandidatë nga lista e hapur. Por vendi i shtatë, i cili i takon një gruaje për shkak të kuotës gjinore, ka përjashtuar nga Kuvendi Xhemal Qefalin – i renditur më i votuari ndër burrat që nuk morën mandat. Kjo ka çuar në një “luftë të heshtur” mes pesë emrave të njohur të PS-së: Olta Xhaçka, Blerina Gjylameti, Etilda Gjonaj, Antonela Dedej dhe Kejsi Elezi.

Aktualisht, Olta Xhaçka kryeson me 2.513 vota, por diferenca me ndjekëset është minimale. Kejsi Elezi ka 2.497 vota; Blerina Gjylameti 2.461; Antonela Dedej 2.151 dhe Etilda Gjonaj 2.132. Çdo kuti e re që hapet mund ta përmbysë renditjen, duke rrezikuar seriozisht mandatin aktual të Xhaçkës – ish-ministre dhe figurë kyçe në qeverinë Rama.

Ky tension brenda partive tregon fuqinë e sistemit me lista të hapura, ku vota popullore mund të rikonfigurojë totalisht përbërjen e Kuvendit. Në vend të emërimeve nga lart, këtë herë është qytetari që zgjedh kush futet në Parlament – dhe kjo, për shumë, është garancia e vetme për një politikë më përfaqësuese.

Renditja aktuale, gjysmat e kutive ende pa numëruar

1. Olta Xhaçka, 2513 vota

2, Kejsi Elezi, 2497 vota

3. Blerina Gjylameti, 2461 vota

4. Antonela Dedej, 2151 vota

5. Etilda Gjonaj, 2132 vota