Ashtu dhe siç ishte paralajmëruar, zv/presidenti i UEFA-s Grigori Surkis vizitoi ditën e sotme Tiranën duke u takuar me Kryeministrin Edi Rama dhe presidentin e FSHF-së Armand Duka.
Fokusi i kësaj vizite ishte mbarvajtja e zgjedhjeve që do të zhvillohen më datë 7 shkurt për kreun e ri të institucionit të futbollit shqiptar.
Takimi i parë u Surkis ishte me kryeministrin e Rama, i cili zgjati më shumë se një orë.
“Delegacioni ynë erdhi në Shqipëri me një mision paqeje, sipas udhëzimeve që kemi marrë nga presidenti i UEFA-s, zoti Ceferin. U takuam me kryeministrin: ishte një ndeshje që zgjati 90 minuta, por nuk kaloi shtesë apo penallti. E dëgjuam njëri-tjetrin dhe kuptuam pozicionet e secilës palë. Qëllimi i vizitës tonë lidhej me shqetësimin, pas sinjalizimeve që kemi marrë së fundmi rreth tentativave të palëve të treta për të ndërhyrë në procesin zgjedhor. Synimi ynë është një dhe i vetëm: të nënvijëzojmë se duhen respektuar principet e UEFA-s, principi i demokracisë, i transparencës dhe i zgjedhjeve të lira. Principe të cilat nuk lejojnë ndërhyrjen e palëve të treta në procesin zgjedhor të Federatës Shqiptare të Futbollit” u shpreh fillimisht Surkis.
Më tej ai i pyetur nëse ka ndonjë fakt për për ndërhyrjen e palëve të treta, Surkis nuk preferoi të përgjiej, por theksoi se bashkëpunimi i autoriteteve vendore me federatën është i nevojshëm.
“Ne nuk jemi hetues dhe as Prokurorë. Ne jemi institucioni përgjegjës për zhvillimin e futbollit në Europë. “Ne kujdesemi për futbollin”, kjo është moto jonë. E kuptojmë që zhvillimi i futbollit nuk është i mundur në asnjë vend pa punën dhe energjitë e autoriteteve shtetërore përkrah federatave. Futbolli është një projekt madhor social, që ndikon në jetën dhe mënyrën cilët jemi, qoftë në Shqipëri dhe Gjermani apo në Ukrainë e Zvicër. Kudo futbolli është shumë i rëndësishëm dhe mendoj se UEFA është një shembull i mirë për tu ndjekur, duke u kujdesur për futbollin dhe duke shpërndarë të ardhurat për zhvillimin e këtij sporti, kudo. Këto janë qëllimet dhe puna jonë, njerëzit që na ndjekin duhet të bëjnë të njëjtën gjë”, përfundoi Surkis./a.m.
