Ka përfunduar tashmë përzjedhja e studentëve që do të mund të vijojnë ciklin e dytë të studimeve në programet “Master shkencor” dhe “Master profesional” në Fakultetin e Historisë dhe Filologjisë në Universitetin e Tiranës për pranimet e vitit të ri akademik 2021-2022. Pas vlerësimit të aplikimeve të bëra nga studentët, ekspertët kanë detajuar tashmë listën zyrtare të studentëve që plotësojnë kushtet për të ndjekur programet e nivelit të dytë në këtë fakultet.
Për shkak të situatës së krijuar nga pandemia e Covid-19, regjistrimi i fituesve në secilin program studimi do të bëhet sipas një grafiku të mirëpërcaktuar. Procesi i regjistrimit do të nisë zyrtarisht ditën e nesërme me datën 3 nëntor. Referuar kushteve të përcaktuara, fituesit e programeve të studimit “Master” duhet të paraqiten pranë sekretarive mësimore për të kryer regjistrimin përfundimtar sipas afatit të aprovuar për secilin program studimi. Procedura e regjistrimit duhet të ndiqet nga vetë studenti që është shpallur fitues, i cili duhet të ketë me vete një dokument identifikimi, si dhe mandatin e pagesës së regjistrimit në vlerën 2.000 lekë, të cilën duhet ta shlyejnë në një nga bankat e nivelit të dytë para se të paraqiten në fakultet për të kryer regjistrimin final.
Në programet “Master i shkencave” procedurat e regjistrimit do të zhvillohen nga ora 10.00-14.00 duke nisur nga data 3 nëntor, për të vijuar sipas grafikut që e gjeni të detajuar në vijim të shkrimit për secilin program studimi. Autoritetet e këtij fakulteti bëjnë me dije se për programet “Master profesional” regjistrimet do të zhvillohen ndërmjet dy fashave 10:00-16:00, si dhe 10:00-13:00 sipas datave të përcaktuara për sceilin program studimi, grafik të cilin gjithashtu e gjeni të detajuar në vijim të shkrimit.
Programet e studimit të ciklit të parë synojnë të japin njohuri bazë mbi metoda e parime shkencore të përgjithshme dhe aftësi të caktuara në një larmi të gjerë profesionesh e specialitetesh. Këto programe realizohen, me 180 kredite europiane (ECTS) dhe kohëzgjatja normale e tyre është 3 vite akademike. Studentët në këtë program, mbështetur në kriteret e vendosura në rregulloren e UT-së për notën mesatare, mund të diplomohen me provim të përgjithshëm përfundimtar ose punim diplome. Në përfundim të programeve të studimit të ciklit të parë, lëshohet diplomë universitare “Bachelor” në fushën e arsimimit të kryer.
Programet e studimit të ciklit të dytë në “Master i shkencave” i pajisin të diplomuarit që zotërojnë diplomën universitare “Bachelor”, me njohuri të thelluara shkencore teorike dhe praktike në drejtimin përkatës. 2. Ky program mund të realizohet me 120 kredite me kohëzgjatje normale jo më pak se dy vite akademike. Këtu përfshihen 30-40 kredite për një projekt kërkimor, nën udhëheqje të kualifikuar, i cili përfundon me diplomë (mikrotezë). Në përfundim të programit të studimit të ciklit të dytë, lëshohet diplomë universitare “Master i shkencave” në fushën e arsimimit të kryer.
Ndërsa programet e studimit “Master profesional” u ofrojnë të diplomuarve me një diplomë të ciklit të parë njohuri me karakter praktik profesional në drejtimin përkatës. Këto studime mund të realizohen me 60 ose 120 kredite dhe kohëzgjatja normale e tyre është një vit ose dy vite akademike Studentët në këtë program, mbështetur në kriteret e vendosura në rregulloren e fakultetit për notën mesatare, mund të diplomohen me provim të përgjithshëm përfundimtar ose punim diplome. Në përfundim të programit të studimit të ciklit të dytë, lëshohet diplomë universitare “Master profesional” në fushën e arsimimit të kryer.
GRAFIKU I REGJISTRIMIT TË FITUESVE TË PRANUAR NË DEGËT E “MASTER SHKENCOR”
- Më datë 3 nëntor do të kryhet regjistrimi i fituesve të degës Gjuhësi.
- Më datë 4 nëntor do të kryhet regjistrimi i fituesve të degës Letërsi.
- Më datë 5 nëntor do të kryhet regjistrimi i fituesve të degës Histori.
- Më datë 8 nëntor do të kryhet regjistrimi i fituesve të degës Marrëdhënie Ndërkombëtare.
- Më datë 9 nëntor do të kryhet regjistrimi i fituesve të degëve Arkeologji, Trashëgimi Kulturore.
- Më datë 10 nëntor do të kryhet regjistrimi i fituesve të degëve Gjeografi.
- Më datë 11 nëntor do të kryhet regjistrimi i fituesve të degës Gazetari Komunikim (numri rendor 1-30).
- Më datë 12 nëntor do të kryhet regjistrimi i fituesve të degës Gazetari Komunikim (numri rendor 31-60).
- Më datë 15 nëntor do të kryhet regjistrimi i fituesve të degës Gazetari Komunikim (numri rendor 61-92).
GRAFIKU I REGJISTRIMEVE PËR FITUESIT NË PROGRAMET “MASTER PROFESIONAL”
- Më datë 3,4,5 nëntor ora 10:00-16:00 do të kryhet regjistrimi i fituesve në degën Histori, Mësuesi.
- Më datë 6 nëntor, ora 10:00-13:00 do të kryhet regjistrimi i fituesve në degën Gjuhë-Letërsi, Mësuesi.
- Më datë 8,9,10 nëntor, ora 10:00-16:00 do të kryhet regjistrimi i fituesve të degës Gjuhë-Letërsi, Mësuesi.
- Më datë 11,12 nëntor, ora 10:00-16:00 do të kryhet regjistrimi i fituesve në degën Gjeografi, Mësuesi, GIS, Guidë turistike.
- Më datë 13 nëntor, ora 10:00-13:00 do të kryhet regjistrimi i fituesve në degët Gjeografi, Mësuesi, GIS, Guidë turistike.
- Më datë 15 nëntor, ora 10:00-16:00 do të kryhet regjistrimi i fituesve në degën, Gjuhë-Letërsi, Mësuesi, për të gjithë ata të cilët nuk mundën të jenë prezent në ditët e caktuara sipas grafikut së mësipërm.
- Më datë 16 nëntor, ora 10:00-16:00 do të kryhet regjistrimi i fituesve në degën Histori, Mësuesi, për të gjithë ata të cilët nuk mundën të jenë prezent në ditët e caktuara sipas grafikut së mësipërm.
- Më datë 17 nëntor, ora 10:00-16:00 do të kryhet regjistrimi i fituesve në degët Gjeografi, Mësuesi, GIS, Guidë turistike, për të gjithë ata të cilët nuk mundën të jenë prezent në ditët e caktuara sipas grafikut së mësipërm.
/b.h
