Në zgjedhjet e 11 Majt për qarkun e Tiranës do të votojnë 913415 qytetarë brenda territorit shqiptar, teksa numri i votuesve të regjistruar nga Diaspora për këtë zonë zgjedhore është 52,431 votues. Numri i mandateve parlamentare për qarkun Tiranë ka ardhur duke u rritur nga viti në vit. Në zgjedhjet parlamentare 2009 dhe 2013 kishte 32 mandate, në 2017 iu shtuan dy duke shkuar në 34 mandate ,në 2021 shkoi në 36 mandate dhe në zgjedhjet e vitit 2025 për shkak të rritjes të numrit të popullsisë në 4-vjeçarin e fundit, Tiranës iu shtua edhe një mandat parlamentar ku nga 36, do të ketë 37 ulëse në Kuvend.
114642 të rinj votojnë për herë të parë në Tiranë, teksa 1081 për shkak të dekriminalizmit nuk kanë të drejtë vote në këto zgjedhje.
Qarku i Tiranës përfshin 5 bashki, Tiranën, Vorën, Kavajën, Rrogozhinën dhe Kamzën. Në zgjedhjet e 2025, i vetëm qarku Tiranë zotëron 26% të vendeve në parlament.
Në zgjedhjet e 2025 marrin pjesë 11 subjekte politike, ku tre prej tyre janë koalicione, teksa qendra votimi që do ti drejtohen qytetarët në total janë 1882. Listat e mbyllura të PD dhe PS kryesohen nga kryetarët e partive politike, për demokratët Sali Berisha e për socialistët Edi Rama.
PS ka vendosur dy drejtues politik për qarkun Tiranë: Ogerta Manastirliu mbulon territorin e bashkisë së kryeqytetit, ndërsa Elisa Spiropali pjesën tjetër të qarkut. Në krahun tjetër, PD ia ka besuar fushatën Belind Këlliçit. Secila parti politike në liste të mbyllur ka dërguar 12 emra teksa për listat e hapura janë regjistruar 37 emra.
Disa prej partive të reja kanë zgjedhur që të vendosin emra fiktiv në lista të mbyllura si revoltë ndaj sistemit të listave, teksa vetë drejtuesit e partive apo ata që realisht synojnë të marrin mandate janë në listë të hapur ku ai që merr një votë më shumë do të shkojë në parlament nëse arrijnë të mbledh votat e nevojshme.
Në zgjedhjet e 2021, Partia Socialiste fitoi 18 mandate, PD 15, LSI sot Partia e Lirisë 2 mandate dhe PS e Tom Doshit arriti të merrte një mandat. Mandat i fundit në Tiranë për zgjedhjet e 2021 u fitua nga PD me 12156 vota. Kjo shifër është orientuese se sa vota do t’i duhen minimalisht një partie të re politike për të marr një mandate në zonën zgjedhore të kryeqytetit.
