Ministri i Jashtëm gjerman Sigmar gabriel ka përsëritur mesazhet e forta për opozitën që t’i jap fund bojkotit dhe bllokimit të Vettingut. Pas takimit me kryeministrin Rama, Gabriel deklaroi se “kush bojkoton parlamentin largon vendin nga rruga e integrimit”.
Ai nënvizoi dhe një herë thirrjen drejtuar opozitës për të ndalur bojkotin e parlamentit i cili largon vendin nga integrimi në BE. “Ne jemi gati të ndihmojmë duke sjellë më shumë vëzhgues zgjedhorë, të diskutojmë më tepër për financimin e fushatës zgjedhore por për këtë duhet të flasim në parlament dhe jo në çadër. Këshillojmë me urgjencë që ky bojkot të mbyllet. Nëse zgjedhjet bojkotohen dhe vendi kalon në situatë kaotike ne nuk mund tju mbështesim. Kush bojkoton parlamentin largon vendin nga BE.”, tha ai.
Nga ana e tij, kryeministri Rama falënderoi Gabriel e Gjermaninë dhe theksoi se, “jam i bindur se do e kapërcejmë këtë moment dhe do jemi në gjendje ta bëjmë këtë”.
“E vlerësoj për angazhimin për të rritur bashkëpunimin dhe mbështetjen e ofruar për procesin e integrimin europian të Shqipërisë, i jemi shumë të njohur Gjermanisë, qeverisë gjermane, kancelares, dhe ministrit të Jashtëm për mbështetjeje e në realizimin e reformave transformuese në vend, dhe padyshim reformës në drejtësi. Një mbështetje e shprehur por edhe e pasqyruar më së miri në ekspertizën dhe asistencën gjermane për forcimin e administratës publike, shtetin e së drejtës, dhe projektet në infrastrukturë, energjetikë, arsim profesional e jo vetëm.
E informova ministrin e Jashtëm për të gjitha hapat që Shqipëria ka ndërmarrë në përmbushje të prioriteteve për anëtarësimin në BE dhe për të gjitha sfidat që ne kemi, duke nisur nga më e rëndësishmja që është fillimi zbatimit të vettignut, për të pastruar sistemin e drejtësisë nga gjykatësit dhe prokurorët e korruptuar. Duam t’i japim mesazhin e qartë ndërkombëtarëve se Shqipëria është fati për të filluar bisedimet për anëtarësimin në BE. Folëm edhe për rajonin.
I dëgjuam më vëmendje shqetësimin e ministrit të Jashtëm gjerman për situatë në rajon. Takimi i radhës në Trieste për procesin e Berlinit synohet të jetë frytdhënës. Patjetër që ne jemi të gatshëm për të vijuar më tej me reformën, dhe do të qëndrojmë përkrah Gjermanisë për sfida të përbashkëta. Synojmë që në Shqipëri dhe rajon të afirmohet fryma Europiane dhe të mbahet larg fryma e aktorëve të tretë që nuk kanë lidhje me perspektivën europiane të Shqipërisë”, tha Rama.
Konferenca është hapur me batuta duke e lidhur situatën politike me futbollin.
Ndërsa Rama i ka shprehur kënaqësinë që ekipi gjerman ta mundë gjithmonë Shqipërinë në futboll, ministri gjerman ia pret po me batutë.
“Nuk ka kufi në miqësinë mes Shqipërisë e Gjermaninë, mund të bëjmë tifozë secili për të skuadrat e veta. Unë bëj tifo për Verder Bremen, gruaja për Bayern, më ka zënë halli me gruan si ty me Bashën”,i tha Gabriel Ramës. /a.m.
