Furça e dhëmbëve është mjeti më i rëndësishëm për higjienën e gojës. Si e tillë, edhe ndaj saj duhet pasur shumë kujdes. Të gjithë duan të kenë dhëmbë të bardhë dhe buzëqeshje rrezëllitëse, por mënyra se si kujdesemi për fuçën është shpeshherë e gabuar. Më poshtë janë të renditura disa gabime që shumica prej nesh bën me furçën e dhëmbëve. Ndiqi me kujdes!
Vendosja e furçës në vende të gabuara
Specilaistët këshillojnë që furça e dhëmbëve duhet të qëndrojë në një vend të hapur, por jo në vende me lagështirë dhe, për më tepër, aty ku mund të ketë kontakt me bakteret. Mos harro asnjëherë që furça të jetë e mbrojtur nga një kapak, por më parë duhet ta lësh të thahet dhe pastaj ta vendosësh aty. Kapaku mbrojtës pengon në mënyrë të ndjeshme futjen e baktereve. Edhe nëse udhëton, furça duhet të jetë e mbuluar që të mbrojë fijet.
Mosndërrimi i furçës për një kohë të gjatë
Dr. Ramzi Matar, përfaqësues i “Winter Park Family Dentistry”, rekomandon ndërrimin e furçës një herë në 3-4 muaj, por edhe në rastet kur ke kaluar një gjendje gripale apo një virus tjetër. Nëse fijet e saj kanë filluar të dëmtohen, zëvendësimi mund të bëhet edhe më shpesh.
Nuk zgjedh furçën e duhur
Të zgjedhësh një furçë të mirë do të thotë që t’i kesh dhëmbët më të shëndetshëm dhe pa dëmtuar zmaltin. Shoqata Britanike për Shëndetin e Dhëmbëve rekomandon përdorimin e furçave të buta, me fije të qëndrueshme, të cilat mund të shkojnë në çdo pjesë të gojës. Por kujdes duhet të tregosh edhe me bishtin mbështetës, i cili ndonjëherë është mjaft delikat. Disa stomatologë rekomandojnë përdorimin e furçës elektronike për shkak të rezultave të shkëlqyera në pastrimin e dhëmbëve.
Shpëlarja me ujë para përdorimit
Dr. Ramzi Matar thotë se kjo nuk është e nevojshme. Nëse furça ruhet në ambient të pastër, të hapur dhe është e mbrojtur me kapak, nuk ka nevojë të shpëlahet para përdorimit.
Mospërdorimi i furçës në pjesët e brendshme
Një furçë e butë është në gjendje të pastrojë çdo pjesë dhëmbësh në gojë. Por shumë njerëz shpeshherë neglizhojnë pastrimin e pjesës së brendshme të dhëmbëve edhe për shkak të furçës së gabuar dhe me fije të forta. Nëse nuk e përdor siç duhet furçën, dhëmbët do të krijojnë shtresa dhe do të dëmtohen nga mbledhja e kaviteteve në shtresën e brendshme.
