Komuna e Amatrices në Itali ka depozituar në prokurorinë e Rietit një denoncim për shpifje në lidhje me çështjen e karikaturave të publikuara pak kohë më parë nga revista satirike franceze ‘Charlie Hebdo’. Mësohet se denoncimi është paraqitur nga avokati Mario Cicchetti.
“Bëhet fjalë për një fyerje makabre dhe e pakuptimtë për të gjitha viktimat e kësaj dukurie natyrore. Kritikat edhe në formën e satirës, janë pjesë e të drejtave dhe lirive në Itali, ashtu sikur edhe në Francë, por jo gjithçka mund të jetë satirë”, pohoi avokati. Ai shtoi më tej se karikaturat, ku shfaqeshin njerëz të gjakosur, është fyerje për viktimat dhe të mbijetuarit nga tërmeti të 24 gushtit, që goditi Italinë qendrore.
Revista franceze, në karikaturën e parë dedikuar tërmetit, sipas padisë së avokateve (ligjoreve) së komunës së Amatrices, i kishte përkufizuar viktimat si “pjata tradicionale të kuzhinës italiane”, ndërsa karikatura e dytë “kishte fajësuar për këtë shkatërrim mafian”. Nga tërmeti që goditi Italinë qendrore humbën jetën 294 persona, si dhe u plagosën qindra të tjerë.
BW/d.i.
