Një 33-vjeçar është arrestuar këtë të enjte në Sarandë pas dyshimeve se ka marrë një 19-vjeçar me forcë në automjet kundër vullnetit të tij. Bëhet fjalë për një ngjarje që ka ndodhur ditën e djeshme, në fshatin Metoq të Sarandës.
Në njoftimin e Policisë thuhet se pas informacioneve se një i ri ishte marrë me forcë në një mjet, strukturat hetimore vijuan veprimet për sqarimin e rrethanave dhe dokumentimin e plotë ligjor të ngjarjes. Nga deklarimet e dhëna para oficerëve të policisë gjyqësore, 19-vjeçari nuk ka pranuar se ishte marrë forcërisht, por hetimet e mëtejshme bënë të mundur zbardhjen e plotë të rastit.
“Si rezultat, shërbimet e Policisë identifikuan dhe arrestuan në flagrancë shtetasin G. O., 33 vjeç, banues në fshatin Gjashtë, Sarandë. Ky shtetas dyshohet se më datë 24.09.2025, rreth orës 13:30, pas një konflikti për motive të dobëta në fshatin Metoq, ka marrë kundër vullnetit të tij në automjetin tip Mercedes-Benz shtetasin F. M., 19 vjeç, duke e mbajtur aty për një kohë të shkurtër dhe më pas e ka lënë të lirë.”, thuhet më tej në njoftimin e uniformave blu.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Heqja e paligjshme e lirisë”.
