Me Francën që e ka hipotekuar trofeun e Kupës së Botës, ajo që ka mbetur pa zbuluar është goli më i bukur i këtij Botërori.
Dhe për këtë FIFA ka hapur sot një sondazh ku janë të përfshirë 18 golat më të bukur të turneut rus. Por megjithëse janë 18 rrjeta, pjesë e këtij sondazhi janë vetëm 17 lojtarë, me yllin rus, Denis Cheryshev që përfaqësohet me dy gola në këtë garë.
Ndërkohë, në këtë sondazh nuk kishte si të mungonte goli i Adnan Januzaj, kjo, pasi mesfushori belg me origjinë shqiptare tundi rrjetën e Pickford në fazën e grupeve.
Një mungesë e rëndësishme është padyshim emri i Granit Xhakës, me mesfushorin zvicerian që kreu një “perlë” përballë Serbisë.
Në listë nuk kishte si të mungonin golat e dy yjeve të futbollit aktual, Lionel Messi dhe Cristiano Ronaldo. Ky është linku ku dhe ju mund të bëheni pjesë e këtij sondazhi.
Votimi do të mbetet i hapur deri të hënën e 23 korrikut, prandaj mos e humbisni këtë mundësi për të zgjedhur të preferuarin tuaj!
