Një skenë e tmerrshme me momente tensioni dhe paniku është duke u zhvilluar mbi urën Magnan në provincën franceze Aix-en-Provence, ku një futbollist i klubit të Nice kërcënon se do të hidhet nga 100 metër lartësi.
Bëhet fjalë për mesfushorin transalpine me origjinë kongoleze, Alexis Beka Beka, i cili këtë sezon ka luajtur edhe titullar për klubin që aktualisht ruan kreun e klasifikimit në Ligue 1.
Mediat raportojnë se futbollisti ka ndaluar në korsinë e emergjencës të autostradës dhe kërcënon se do të kryejë vetëvrasje duke u hedhur nga ura.
Një operacion për të shmangur tragjedinë është duke u zhvilluar në vendngjarje, teksa me urgjencë në vendngjarje kanë mbërritur zjarrfikësit, forca të shumta policie dhe psikologu i klubit, që po përpiqet të qetësojë Bekan.
Dyshimet paraprake janë se djali ka menduar të bëjë vetëvrasje pas një zhgënjimi nga një lidhje dashurie. Nuk është rastësi që disa shokë të skuadrës, të cilët e kanë dëgjuar lajmin teksa po stërviteshin në fushë, po tentojnë të kontaktojnë me ish të dashurën e tij për ta ftuar të shkojë në vendngjarje që të bëjë mesfushorin të tërhiqet nga akti ekstrem.
Ndërkohë, klubi i Nice ka vendosur të anulojë të gjitha konferencat për mediat që kishte planifikuar, këtë të premte. Por, futbollistët do të vijojnë stërvitjen nën urdhrat e trajnerit Farioli, pasi kanë një ndeshje në shtëpi kundër Brest-it, të planifikuar për t’u zhvilluar të dielën në orën 15:00.
Mesfushori i lindur në vitin 2001 nënshkroi kontratë me Nice në qershor të vitit 2022, me klubin francez që pagoi 14 milionë euro për kartonin e tij.
I lindur në Paris, 22-vjeçari luajti 14 ndeshje sezonin e kaluar. Në karrierën e tij, ai është aktivizuar me Lokomotivën e Moskës dhe Caen, klubi në akademinë e së cilës ai u rrit. Duke qenë prej vitesh pjesë e kombëtares franceze të moshave, mesfushori mori pjesë edhe në Lojërat Olimpike të Tokios në vitin 2021./f.s
