Konfliktet e të birit mund të fshihen pas tritolit në makinën e zyrtarit të Bashkisë Fushë-Krujë, shpërthim që tronditi familjen Xaka mbrëmjen e së dielës, ku fatmirësisht nuk pati të lënduar, por vetëm dëme materiale.
Burime nga Policia lokale thanë për gazetën “Panorama” se konfliktet e djalit të Vesel Xakës janë shkaku i shpërthimit që u regjistrua në periferi të Fushë-Krujës. Policia ka pyetur fillimisht zyrtarin e bashkisë, njëkohësisht edhe kryefamiljar, Vesel Xakën dhe të birin e tij Sabah Xaka, nëse kishin ndonjë konflikt të hapur dhe të dy kanë mohuar në mënyrë kategorike të kenë probleme të hapura.
“Po hetojmë me intensitet të lartë këtë ngjarje. Kemi shoqëruar disa persona për verifikim. Këtë shpërthim po e hetojmë në dy drejtime: rreth detyrës shtetërore të shtetasit Vesel Xaka dhe konfliktet e të birit Sabah Xaka. Kjo e dyta është më interesante, pasi kemi dyshime që i biri ka konflikte dhe po i verifikojmë”, thanë burime nga grupi hetimor, duke shtuar se në shpërthim janë përdorur të paktën 100 gr lëndë plasëse e llojit tritol. Të njëjtat burime nënvizojnë se për këtë arsye është marrë në pyetje Sabah Xaka, djali i 63-vjeçarit.
Ngjarja e rëndë ndodhi mbrëmjen e së dielës rreth orës 23:00, në periferi të qytetit të Fushë-Krujës. Automjetit tip “Golf 6”, e parkuar në oborrin e një shtëpie, i është vënë një sasi lënde plasëse dhe nga shpërthimi mësohet se nuk ka të lënduar në njerëz, por vetëm dëme materiale. Pronari i makinës, Vesel Xaka, 63 vjeç, është punonjës i Bashkisë së Krujës, në Njësinë Administrative të Cudhit.
Vetëm 10 ditë më parë, po në FushëKrujë, një tjetër automjeti që ndodhej gjithashtu i parkuar në oborr iu vendos tritol. Shpërthimi i fundit regjistron të shtatin brenda këtij viti në Rrethin e Krujës, ku objektiv ishin biznese, banesa, automjete dhe shtyllat e tensionit të lartë. Në asnjë rast, Policia nuk ka vënë në pranga asnjë prej autorëve.
/a.meta
