Kandidati republikan, Donald Trump, dhe ai demokrat, senatori i Vermontit, Bernie Sanders, janë fituesit zgjedhjeve paraprake për garën presidenciale të 2016-s në New Hampshire.
Sanders, që doli i pari përpara Hillary Clinton, tha se kjo fitore dëshmoi se njerëzit duan ndryshime reale, ndërsa ish-Sekretarja e Shtetit ishte e para që e uroi për fitoren, duke deklaruar se do të vazhdojë të luftojë për çdo votë në fushatë.
Ndërkohë, pasi njoftoi për fitoren e tij, edhe miliarderi Trump uroi social-demorkatin Sanders për fitoren por duke mos harruar t’ju kujtojë amerikanëve se ai “dëshiron që t’ia dhurojë vendin të tjerëve” për shkak të politikave të tij.
Votimet në New Hampshire rezultuan me një përmbysje pasi në Iowa ishin Hillary Clinton nga kampi demokrat dhe Ted Cruz nga ai republikan, të cilët dolën fitues.
Për ndryshim nga rezultati shumë i ngushtë në Iowa mes Clinton e Sanders, në New Hampshire social-demokrati kishte një diferencë të theksuar në vota ndaj ish-Sekretares së Shtetit.
TCH