Kryeministri Edi Rama ka qenë i pranishëm në qytetin e Ersekës për të bërë prezantimin zyrtar të kandidatit të majtë, mjekun Ilia Stefo për postin e kreut të Bashkisë së Kolonjës.
Rama është shprehur se modeli i të majtëve flet qartë në krahasim me atë të opozitës. Kryeministri ka “ngacmuar dhe deputetin e PS Pandeli Majko, duke i kujtuar atij batutën që bëri për mjekun Ilia Stefo.
“Ilia Stefo është njeriu i duhur për të vazhduar në drejtimin e duhur dhe për të ecur së bashku me ju drejt objektivit të transformimit rrënjësor të këtij vendi.
Kur u takuam, Pandi tha Ilia e ka menduar mirë, është veshur njësoj si ti kur ishe kryetar bashkie, me të kuqe!
Ne sot jemi në kushtet kur mund të vijmë dhe të kërkojmë me kokën lart mbështjetjen e gjithë këtij komuniteti, pasi jemi të bindur se pas vështirësive të mëdha, hallet dhe sakrificave, ky komunitet e ka të qartë se qeveria dhe kjo shumicë i ka hapur rrugë një procesi rrënjësor reformash.
Edhe ky kantier që Arbeni nuk mundi ta shihte të përfunduar, nuk është se zgjidh problemet e papunësisë apo të varfërisë, por ama, ky kantier, kjo hapësirë publike e transformuar, i jep të gjithëve mesazhin e qartë se një epokë ere ka filluar.”– tha Rama./java/a.k
