Ndonëse në momentin e zgjedhjes si Presidenti i Republikës, Ilir Metaj u zotua se do të përfaqësonte unitetin e të gjithë popullit, prej disa ditësh tashmë ai është angazhuar aktivisht në fushatë për LSI, duke shkelur që pa nisur ende punën Kushtetutën e Republikës.
Me pretekstin e “turit të lamtumirës”, Meta është duke takuar militantët e tij në çdo qark, ndërsa pothuajse përditë, në ekranet e televizionit jep deklarata tërësisht politike, madje duke parashikuar edhe pozicionin që do të mbajë LSI pas zgjedhjeve, diçka që zyrtarisht i takon kryetarit të ri, Petrit Vasilit dhe strukturave të partisë.
Ky qëndrim, jo vetëm zhvlerëson reputacionin e Vasilit si kryetar të partisë, por bie ndesh me nenin 86 të Kushtetutës, që përcakton se “Presidenti i Republikës është kryetar i shtetit dhe përfaqëson unitetin e popullit”. Ky përcaktim i Kushtetutës është i vlefshëm që në momentin kur Presidenti zgjidhet.
Ndonëse nuk është betuar ende, Presidenti i ardhshëm nuk mund të mbrojë në dy muajt pararendës interesin e më pak se 10% të shqiptarëve, saç është përqindja e votës së fituar në LSI në zgjedhjet e fundit.
Përveç Kushtetutës, veprimet e Metajt bien ndesh qartësisht edhe me ligjin për Presidentin e Republikës, i cili rregullon veprimtarinë e kreut të shtetit. Neni 7 i këtij ligji, qartëson se “Presidenti i Republikës nuk mund të mbajë asnjë detyrë tjetër publike, nuk mund të jetë anëtar i asnjë partie dhe as të kryejë veprimtari tjetër private”.
Aktualisht, Metaj argumenton se “turi i lamtumirës” është akti i tij i fundit si kryetar “de facto” i LSI. Ajo që mbetet e paqartë është se përse Metaj duhet të niste këtë tur pikërisht tani, kur nga zgjedhjet dhe deri në marrjen e detyrës së Presidentit në 24 korrik, Metaj do të kishte plot një muaj kohë për t’u përshëndetur me militantët./Lexo.al
