Nga Mero Baze
Dikush duhet ta këshillojë Presidentin Ilir Meta, të mos publikojë fotot që bën në SHBA. Jo se del keq në foto. Nuk duket keq me shëndet, në qoftë se nuk flet dhe nuk i shoqëron me diçitura.
Por dikush duhet ta këshillonte, që të krijonte një lloj mistike, meqë shkoi deri në Uashington në një vizitë të lobuar .
Mund të mjaftohej me foton tek Mëngjesi i Lutjeve, tek pjata e dytë me Sekretarin e Shtetit Michael Pompeo dhe pastaj ta linte pa njoftime. Dikujt në Tiranë nga mbështetësit e tij, së paku do t’i jepej mundësia të fantazonte se Presidenti i ka ca miq matan oqeanit dhe po bën ndonjë punë, për të shpëtuar nga shkarkimi, apo për të ndrequr raportet e prishura me SHBA me të cilën u konfrontua publikisht për Reformën në Drejtësi dhe zyrtarisht para 30 Qershorit kur tentoi të fuste vendin në luftë civile.
Publikimi i fotove dhe akoma më keq diçiturat e tyre, ia zbehin vlerën jo vetëm udhëtimit, por dhe çmimit me të cilin është siguruar. Për shembull çfarë mendon një anëtar i thjeshtë i LSI apo qoftë dhe i PD, kur dëgjon se Presidenti ka takuar Drejtorin Ekzekutiv të Programit Botëror të Ushqimit dhe kanë diskutuar për mirërritjen e fëmijëve.
Presidenti jonë nuk ka qenë ndonjë herë drejtor i AKU dhe as është marrë me tema të sigurisë ushqimore. I vetmi arysetim është që mund të kenë folur se si ka ndryshuar shëndetin pas dietës dhe si ka humbur kile.
Nuk di po ashtu çfarë rëndësie ka për një mbështetës të Ilir Metës në Shqipëri, fakti që ai ka takuar për herë të dytë brenda dy ditëve një kongresmen republikan në koridoret e Kongresit.
Duket sikur i ke zënë prit aty kujtdo që kalon dhe ky meqë i paska dhënë dorën një herë, i duket fytyrë e njohur, I flet prap, buzëqesh dhe del prap në foto.
Lere pastaj fotot e përzemërta me stafin e VOA dhe Këshillin e Ambasadorëve. Të gjitha këto detaje frustruese të një vizite ku nuk e ka ftuar askush, dhe që i ngjan një fushate “derë më derë” si ajo e Lulzim Bashës, do të ishte e denjë të maskoheshin nga stafi, duke mos i publikuar fotot.
Le të krijohej ideja që ka shkuar për një punë të rëndësishme në SHBA, që së paku të nënkuptohej se po përpiqet të pajtohet me Uashingtonin dhe t’i kërkojë falje zotit Palmer, që e ka sulmuar publikisht dhe familjarisht, ndërsa SHBA bëri thirrje të respektohej 30 Qershori dhe jo çmenduria e tij e 13 Tetorit.
Duke mos publikuar asgjë mund të funksiononte më mirë. Bile mund ta shtynte disa ditë qëndrimin, siç e bënte Bujar Nishani, që e niste me dreka në New York dhe shkonte në çdo restorant shqiptar me qofte e mish, anembanë SHBA dhe kthehej pas dy javësh. Kështu do të dukej dhe më konspirative vizita e tij.
Por publikimi i fotove me shpjegimet përkatëse, tregojnë gjithë arsyet përse nuk është serioze, që Presidenti të shkojë në SHBA për të trokitur derë më derë.
Dhe si për ta djallosur deri në fund, ende pa u kthyer, nxjerr Tit Vasilin t’i këkrojë llogari SHBA pse nuk ndryshon rrugë ndaj qeverisë Rama. Kërkon deomos të na mbush mendjen, që nuk ia ka mbushur dot mendjen askujt në SHBA.
