Katër persona kanë humbur jetën gjatë një aksidenti automobilistik pak pas mesnate. Ngjarja e rëndë, ku ka humbur jetën nëna me vajzën e saj 15 vjeçe, si dhe dy shtetas të tjerë, u shënua mbrëmë në afërsi të fshatit Libonik, tek Ura e Drithasit.
Në aksidentin e rëndë mbetën të vdekur: Ergi Manllija, 29 vjeç, drejtuesi furgonit të mallrave tip “Mercedes Benz”, nga fshati Fier-Shegan, Lushnjë, Deljon Qerreti, 24 vjeç, banues në të njëjtin fshat, si dhe Merita Hyka, 41 vjeçe dhe vajza e saj A.Hyka, 15 vjeçe, nga fshati Orman-Pojan i Korçës.
Sipas policisë të katër këta persona ishin duke udhëtuar së bashku në kabinën e mjetit, duke shkelur rregullat e qarkullimit, çka dhe për ekspertët e policisë rrugore ka pasur ndikim në humbjen e vëmendjes së drejtuesit të mjetit.
Sipas tyre, mjeti nuk ka qenë me shpejtësi në momentin e përplasjes me parmakët metalik të urës, pasi në vendin e ngjarjes nuk janë gjetur gjurmë frenimi. Nga provat e mbledhura mësohet se, devijimi i mjetit ka qenë aq i shpejt sa drejtuesi i mjetit, 29-vjeçari Ergi Manllija, e ka pasur krejt të pamundur mbajtjen e mjetit mbi urë.
Pas rrëzimit, automjeti i ka zënë poshtë të katër personat, të cilët gjetën vdekjen e menjëhershme. Ndërkohë, trupat e pajetë të viktimave, janë nxjerrë me vështirësi rreth 3 orë pas ngjarjes.
