Shtetet e Bashkuara po kërkojnë një rrugëdalje nga lufta me Iranin, ndërsa sulmet ajrore nuk kanë arritur ta detyrojnë Teheranin të pranojë kërkesat e Uashingtonit. Sipas CNN, kreu i Shtabit të Përbashkët, gjenerali Dan Caine, u ka kërkuar privatisht zyrtarëve të lartë të Shtëpisë së Bardhë që të gjendet sa më shpejt një zgjidhje për konfliktin.
Caine paralajmëron se vetëm bombardimet nuk mund të përmbushin objektivat e presidentit Donald Trump dhe se përshkallëzimi do të sillte pasoja të rënda. Shqetësimi kryesor lidhet me konsumimin e rezervave amerikane të municioneve dhe rrezikun e një hakmarrjeje më të fortë nga Irani. Gjenerali kundërshton edhe një ndërhyrje tokësore për rrëzimin e regjimit në Teheran, pasi një skenar i tillë mund t’u kushtojë shtrenjtë forcave amerikane.
Ndërkohë, vijojnë përpjekjet diplomatike dhe Uashingtoni shpreson për një marrëveshje mes Iranit dhe Omanit për menaxhimin e Ngushticës së Hormuzit. Zëvendëspresidenti amerikan JD Vance tha se negociatat kanë shënuar përparim, por paralajmëroi se lufta nuk është pranë fundit dhe “jemi në mes të lojës”. Vance shtoi se Shtetet e Bashkuara po përdorin mjete diplomatike, ekonomike dhe ushtarake për të arritur rezultatin më të mirë për amerikanët.
Në të njëjtën kohë, Turqia, Pakistani dhe Arabia Saudite kanë nënshkruar një marrëveshje të re mbrojtjeje, për të cilën ministri i Jashtëm turk Hakan Fidan thotë se nuk synon Iranin. Sipas Fidanit, marrëveshja mund të zgjerohet edhe me Egjiptin dhe vende të tjera, ndërsa tre shtetet po punojnë për krijimin e një strukture të përbashkët sigurie.
