Një rimorkiator italian, i cili ishte nisur nga Ankona drejt Shqipërisë, u fundos mbrëmjen e 18 majit në brigjet e Pulias, 50 milje nga Bari, në kufirin midis ujërave italiane dhe kroate. Sipas asaj që shkruan italiania La Repubblica, 2 persona humbën jetën dhe 3 të tjerë rezultojnë të zhdukur: nga ana tjetër, komandanti u gjet i gjallë gjatë natës dhe u dërgua me urgjencë në spitalin Di Venere në Bari, gjendja e tij nuk është e rëndë.
Aktualisht Roja Bregdetare e Barit po koordinon mjetet ushtarake dhe civile të përfshira në kërkim: pesë anije tregtare, si dhe njësi të ndryshme të Rojes Bregdetare dhe Guardia di Finanza. Kërkimet përfshijnë gjithashtu avionë nga Marina, Forcat Ajrore dhe Forcat Ajrore Kroate. Një avion Manta i rojes bregdetare italiane po fluturon aktualisht mbi zonë në kërkim të të zhdukurve. Autoritetet kroate informuan autoritetet italiane për praninë e dy viktimave të konfirmuara. Tre persona të tjerë janë ende të zhdukur dhe sa më shumë kalon koha aq më shumë zbehen shpresat për të mbijetuar.
Mediat italiane thonë se ekuipazhi përbëhej nga katër italianë dhe një tunizian.
Alarmi u dha të mërkurën në mbrëmje: qendra operacionale e Rojes Bregdetare të Romës mori një sinjal alarmi cospas-sarsat nga i cili u mësua se një rimorkiator me flamur italian – Franko P, i angazhuar në tërheqjen e një pontoni në seksionin Ankona-Durrës – po fundosej 53 milje përtej portit të Barit, në kufirin midis ujërave italiane dhe kroate.
/a.r
