Koha ka ecur dhe e ka bërë duke “vrapuar”… Vitet ikin për të gjithë, por sa herë afrohesh në fund të një cikli, historie, apo qoftë edhe karriere, nis të kuptosh se sa shumë e ke dashur sportin që ke praktikuar përgjatë 22 vitesh mes Serie B dhe Serie A…
Sergio Pellissier ka mbërritur në finish! Tani, i ka mbetur të presë litarin në një maratonë të nisur në vitin e largët 1996. “Kam reflektuar gjatë dhe vendosa të tërhiqem në fund të sezonit, pasi e ndjej të nevojshme.
Mbyllet një cikël. Do të kisha dashur që ta bëja duke i siguruar mbijetesën Chievos, por ja që ndonjëherë nuk mund të kërkosh më shumë nga sa vjen… Eshtë e drejtë që klubi të rindërtohet dhe t’i japë hapësira futbollistëve më të rinj”.
Një histori e bukur për t’u treguar. Të duket një pafundësi, por nuk është ashtu. Torino, Vareze, SPAL dhe Chievo. Këto katër stacione për një futbollist që ndoshta mund të kishte luajtur edhe me fanella më prestigjoze, por që ka mbetur besnik i “provincës”. Gjithçka nisi me Turneun Viareggio, kur në moshën 14 vjeç me fanellën e Torinos shkëlqente dhe shënonte…
Sot është 40 vjeç, por ka vendosur një rekord i cili duhet ende të thyhet, mbase edhe nga vetë ai. Në moshën 39 vjeç e 290 ditë, Pelissier ka shënuar golin “më të vjetër” në Serie A. Plot 174 gola mes profesionistëve, 112 nga të cilat në Serie A me fanellën e Chievo Verona, një lëkurë e dytë për të. Plot 19 vite të kaluar me verdheblutë, ose “gomerët fluturues”.
Pikërisht kjo nofkë ishte ajo që Chievo mori kur me mjeshtrin Del Neri arriti që të mrekullonte Serie A, duke mbajtur kryesimin e kampionatit thuajse një fazë, atëherë kur u arrit Europa dhe kur ëndrrat u bënë realitet. “Gomerët fluturuan”, me të vërtetë… Mes tyre, edhe ai, Sergio Pelissier, “djaloshi” që nisi të luante në Aosta, qyteti i lindjes.
Pikërisht ai, veterani që nuk njihte plakje, por që tani, si të gjithë, duhet të thotë “mjaft”.
Fanella me numër “31” do të tërhiqet, ashtu si ka lajmëruar Chievo. Ndërkohë, kanë mbetur edhe tre ndeshje për të luajtur. Më pas… “Ndoshta bëhem drejtues, por dua rol me përgjegjësi jo si figurë simbol!”. Sepse, Pelissier, në karrierën e tij, nuk është mësuar të qëndrojë i palëvizur, por të luftojë…telesport
g.kosovari
