FSHF i ka dërguar ultimatum klubit Flamurtari për pagesën që i detyrohet ish-lojtarit në sezonin 2010-2011, Aleksander Bajevski.
Ne rast të kundërt, Flamurtari rrezikon heqjen e gjashtë pikëve në renditje.
Drejtuesit e rinj të klubit kanë bërë të ditur se do ta paguajnë shumën që u kërkohet, por në komunikatë nuk kanë ngurruar të shigjetojnë drejtimin e mëparshëm, si akumulues i borxheve.
“Duke marrë shkas pikërisht nga situata e krijuar në rastin e Toni Pezos, për të cilin klubi u penalizua me minus tri pikë dhe rastin e fundit Bajevskit, duam të vëmë edhe një herë në dukje “dashamirësinë” e Këshillit të Bashkisë dhe Bashkisë Vlorë për situatat e krijuara nga borxhet në periudhën kur skuadra menaxhohej totalisht dhe 100% prej tyre.
Këshilli i Bashkisë Vlorë dhe Bashkia Vlorë po gjejnë kohen e mjaftueshme të merren me buxhetin e KF Orikumit dhe problematikat e kësaj skuadre në kategori të dyte, por në asnjë rast dhe moment ky këshill dhe kjo bashki nuk kanë gjetur mundësinë të njihen dhe shqetësohen për problematikat e borxheve të vjetra të Flamurtari F.C duke mos u shqetësuar thuajse asnjëherë se çfarë mund të ndodhte në rastin më të keq me skuadrën e Flamurtari FC.
Këshilli i Bashkisë dhe Bashkia Vlorë janë dy institucione përgjegjëse me dije të plotë ndaj veprimtarisë së Flamurtari F.C, gjë të cilën gjithsesi nuk e kane shfaqur asnjëherë .
Presidenca aktuale e Flamurtari F.C që ka nën administrim Flamurtari Football Club, ka vendosur gjithsesi të kryej në kohën e duhur pagesën e plotë ndaj ish lojtarit Aleksander Bajevski ,për ti paraprirë dhe mos lejuar penalizmin e radhës se Flamurtari F.C me minus gjashtë pikë.
Presidenca aktuale vendos të kryej pagesën, me qëllimin për të vijuar ecurinë pozitive të skuadrës gjatë këtij sezoni futbollistik”, thuhet në deklaratën e klubit kuqezi.
BW
