Nëpër rrjetet sociale po qarkullon një deklaratë e një profili me emrin Xherdan Shaqiri, e bërë një vit më parë, sipas së cilës bëhet me dije se Armando Duka i ka kërkuar atij 100 mijë euro që të bëhej pjesë e kombëtares së Shqipërisë.
Lojtari i kombëtares helvete, tashmë, e nënvizon këtë fakt si shkakun e fyerjeve që merr tashmë nga shqiptarët, pse ka zgjedhur kombëtaren helvete, e cila, sipas tij, i ofroi mundësinë dhe të gjitha kushtet e duhura.
Ndaj këtij statusi, që është kthyer në një “vbirus viral” në internet, ka reaguar përmes një deklarate FSHF-ja, në të cilën thuhet: “FSHF shpreh keqardhjen që në këtë moment fantastik të historisë së futbollit tonë, që po e jetojmë të gjithë së bashku, falë djemve të kombëtarës, trajnerit dhe ekipit drejtues të federatës, një profil falso në Facebook dhe një status i rremë i Xherdan Shaqirit merr jehonë përmes portalesh të caktuara, duke dëmtuar imazhin e FSHF-së, shkruan Telesport.
“Ne vlerësojmë çdo pikëpamje kritike mbi punën dhe nuk mund t’i heqim të drejtën askujt që të mendojë se kombëtarja duhet të fitojë çdo ndeshje dhe uron që falsitetet e profileve të rremë në Facebook të mos përfshihen në debatin e shëndetshëm, pasi dëmtojnë rëndë kombëtaren në këtë moment historik. FSHF u është mirënjohëse të gjithë lojtarëve të kombëtares për përkushtimin e tyre maksimal dhe, pavarësisht fjalëve, që i merr era, ka bërë e do të bëjë vetëm një politikë: Dyer të hapura për këdo, sipas meritës!”
ma.me
