Federata Shqiptare e Futbollit ka vendosur që më në fund të zyrtarizojë fillimin e sezonit të ri futbollistik me përcaktimin e kalendarit të Kategorisë Superiore.
FSHF ka njoftuar se nesër, në orën 11, do të hidhet shorti për të përcaktuar kalendarin e këtij sezoni, i cili sipas deklaratave të drejtuesve të institucionit që rregullon aktivitetet futbollistike në vendin tonë, “mbahej peng” nga klubet që kishin detyrime ndaj palëve të treta.
Ndonëse klubet në fjalë, Tirana dhe Flamurtari, vazhdojnë të kenë detyrime dhe nuk i kanë shlyer ato përfundimisht, FSHF ka vendosur të mos zgjatë më këtë procedure dhe gjatë ditës së mërkurë do të hedhë shortin.
Kësisoj, klubet do të kenë mundësinë që të fillojnë përgatitjet më konkretisht, duke qenë në dijeni të emrit të skuadrave që do të përballojnë në fillimin e sezonit dhe për më tepër në cilat stadiume do të luajnë, duke pasur parasysh se në këtë edicion, do të ketë shumë probleme sidomos për sa i përket ndeshjeve që duhet të luhen në kryeqytet.
Kujtojmë që Tirana dhe Korabi do të luajnë në “Selman Stërmasi”, ndërsa Partizani nuk ka ende zyrtarisht një stadium për të luajtur ndeshjet e tij në këtë sezon./panorama/a.k
