Interesimi i jashtëzakonshëm i tifozëve shqiptarë për të qenë prezentë në sfidën e “Play Off”-it në Varshavë ka shtyrë Federatën Shqiptare të Futbollit që të futet në bisedime me homologët polakë për të siguruar më shumë bileta sesa 5% që lejon rregullorja e UEFA-s për ekipet në transfertë.
Zyrtarisht, Kombëtarja shqiptare ka të drejtë të ketë afro 3 mijë bileta në dispozicion në shkallët e stadiumit “Narodovi”, por burimet pranë FSHF bëjnë me dije se, për momentin, ka një sinjal pozitiv nga Polonia për të pasur 4 mijë e 500 tifozë të pranishëm për sfidën e 26 marsit, e cila është vendimtare për kualifikimin në Kampionatin Botëror.
Federata po punon që ky numër të shkojë afro 6 mijë bileta, por ende nuk ka një përgjigje zyrtare nga Polonia. Këta të fundit janë duke shqyrtuar me detaje çështjet e sigurisë për një transfertë që nuk do të jetë e lehtë, edhe për faktin se vetë tifozët polakë njihen si problematikë.
Shqipëria siguroi kualifikimin për herë të parë në “Play Off”-in e Botërorit dhe shorti e vuri përballë Polonisë në transfertë. Në rast kualifikimi, kuqezinjtë do të përballen me fituesin e çiftit Suedi–Ukrainë.
