Prokuroria e Përgjithshme ka regjistruar procedimin penal për ish-ministrin e Financave Ridvan Bode I kallëzuar nga Inspektorati i Lartë i Deklarimit dhe Kontrollit të Pasurisë për veprën penale të fshehjes dhe deklarimit të rremë të të pasurisë.
Sipas asaj që bëhet e ditur nga komunikata e Prokurorisë, është parë e nevojshme nisja e veprimeve hetimore për ish-ministrin Bode
“Prokuroria vlerëson se është e nevojshme kryerja e veprimeve hetimore për të vërtetuar nëse ekzistojnë elementet e veprës penale për të cilën është kallëzuar”, thuhet në njoftimin zyrtar të Prokurorisë.
Por nga ana tjetër, edhe Bode ka kallëzuar ILDKP duke e akuzuar këtë institucion për mashtrim pasi sipas tij akuzat e ngritura ndaj tij janë plotësisht të pa vërteta dhe se ILDKP po mashtron me ato që thotë.
Më herët, ILDKP e ka paditur Boden për veprën penale të “Refuzimit për deklarim, mosdeklarimit, fshehjes ose deklarimit të rremë të pasurive të personave të zgjedhur dhe nëpunësve publikë ose i çdo personi që ka detyrimin ligjor për deklarim” dhe “Pastrimit të produkteve të veprës penale ose veprimtarisë kriminale”. Sipas këtij institucioni ish-ministri ka refuzuar disa herë të paraqitet për të dhënë shpjegime në lidhje me burimet e krijimit të pasurisë së tij, të familiarëve dhe të personave të lidhur me të.
Redaksia Online
(Javanews.al)
