Frikë nga trazirat, Skënderbeu paralajmëron tifozët
Në prag të ndeshjes së kthimit të Ligës së Kampioneve në “Elbasan Arena” kundër Milsami Orhei, klubi i Skënderbeut ka gati një plan masash ekstreme për sigurinë në fushë dhe mbarëvajtjen e ndeshjes deri në fund. Po ashtu, drejtuesit e skuadrës u kanë bërë thirrje tifozëve të tyre të shmangin çdo incident apo provokim të mundshëm para, gjatë dhe pas ndeshjes.
Trazirat e shkaktuara në ndeshjen Kukësi – Legia Varshavë të enjten e shkuar në “Qemal Stafa” për Ligën e Europës, kanë detyruar drejtuesit e klubit korçar të parandalojnë ndonjë “harbim” të tifozerisë, duke parë që rezultati i ndeshjes së parë në Moldavi është i favorshëm për kualifikimin në “play off”. Ndeshja e kthimit kundër kampionëve të Moldavisë do të zhvillohet në “Elbasan Arena”, duke parë që stadiumi “Skënderbeu” nuk plotëson parametrat e duhura sipas UEFA-s.
Kësisoj, me kualifikimin në “xhep”, drejtuesit bardhekuq i kërkojnë tifozerisë së tyre të tregojnë kulturë dhe qytetari në një sfidë kaq të rëndësishme, jo vetëm për futbollin korçar, por edhe për atë shqiptar. Sipas “Sport News”, presidenti Ardjan Takaj dhe drejtuesit e klubit kanë zhvilluar takimet e nevojshme me drejtuesit e Policisë së Shtetit, e cila pritet të jetë me një numër rekord forcash të rendit në “Elbasan Arena” për të garantuar që gjithçka të shkojë në rregull.
Në të njëjtën kohë paralelisht në stadium do të jetë sërish edhe një numër rekord stjuardësh të kompanisë që ka marrë përsipër sigurinë, rreth 120 të tillë, të cilët janë instruktuar dhe kanë zhvilluar trajnimin e nevojshëm jo vetëm për t’iu përgjigjur situatave nga më të ndryshmet, por mbi të gjitha në parandalimin e incidenteve dhe personave problematikë. Nga ana tjetër, mësohet se masa të detajuara do të merren edhe nga ana e UEFA-s. Të hënën, delegatët e organizimit europian të futbollit, do të jenë në Elbasan për të marrë në dorëzim stadiumin, duke përcaktuar gjithçka për sa u përket masave të sigurisë.
Alarmi që ka kapur klubin korçar, duke parë rastin e Kukësit në Ligën e Europës, ka bërë që Skënderbeu të marrë masa për të parandalimin e çdo të papriture. Në një komunikatë për shtyp, kampionët e vendit theksojnë: “Dëshirojmë t’ju bëjmë thirrje për qetësi para dhe gjatë zhvillimit të ndeshjes. Klubi ynë, në bashkëpunim me instancat përkatëse, po merr masat e duhura për zhvillimin normal të ndeshjes”. Sipas burimeve, Skënderbeu ka marrë masat e duhura për të shmangur ndonjë ngjarje të dhunshme në stadium që mund ta dëmtojë klubin për të vazhduar ëndrrën europiane.
“Shpresojmë që tifozeria jonë të përcjellë kulturën e zakonshme, duke mos u bërë pjesë e incidenteve që mund të dëmtojnë klubin dhe të ndërpresin këtë ëndërr të madhe europiane”, vijon komunikata për shtyp. Të mërkurën e datës 5 gusht, “Ujqërit e dëborës” presin në “Elbasan Arena” Milsami Orhein, për ndeshjen e kthimit, ndërkohë që në ndeshjen e parë të zhvilluar në Moldavi, ata fituan 2-0 me një dygolësh të Hamdi Salihit. Kualifikimi historik në “play off”-in e Champions-it është një hap larg, ndërsa ai në fazën e ndeshjeve me grupe të Europa Legaue thuajse është arritur. Mjafton që gjashtë herë kampionët e vendit të ruajnë rezultatin dhe tifozët të ruajnë qetësinë në shkallët e stadiumit, siç kanë bërë gjithnjë.
