Analistët ndërkombëtarë janë të shqetësuar pas raportimeve për dëmtimin e kabllos nënujore që lidh Finlandën me Gjermaninë.
Të dy vendet shprehën “shqetësimin e tyre të thellë” pas këputjes së kabllos C-Lion1, sepse siguria e infrastrukturës evropiane është në rrezik, veçanërisht në mes të tensioneve me Rusinë.
Kablloja 1,170 km e gjatë ndaloi së punuari mesditën e djeshme, me kompaninë finlandeze të menaxhimit Cinia që raportoi se të gjitha fibrat optike të kabllos ishin dëmtuar.
Një zëdhënës i Cinia tha se “dëme të tilla nuk ndodhin në këto ujëra pa ndërhyrje nga jashtë”, duke i mëshuar mundësisë së sabotimit.
Në një deklaratë të përbashkët, ministrat e jashtëm të Gjermanisë dhe Finlandës nënvizuan kërcënimin në rritje të luftës hibride, duke theksuar: “Siguria evropiane kërcënohet jo vetëm nga lufta agresive e Rusisë në Ukrainë, por edhe nga veprimet hibride të aktorëve keqdashës”.
Edhe pse problemi nuk ndikoi në lidhjen e internetit mes dy vendeve, falë rrugëve alternative të kabllove, incidenti ka ngritur shqetësime serioze për cenueshmërinë e infrastrukturës jetike.
Dëmtimi i infrastrukturës jetike të Detit Baltik ka nxitur frikën e përdorimit të metodave të luftës hibride nga aktorët keqdashës. Në deklaratën e përbashkët të dy ministrave të jashtëm theksohet se kërcënimi i veprimeve të tilla mund të ketë pasoja të rënda për sigurinë evropiane.
Kina dhe Rusia kanë qenë tashmë në qendër të vëmendjes për sulmet e mundshme në infrastrukturë, ndërsa NATO ka rritur bashkëpunimin për të mbrojtur lidhjet dhe tubacionet nënujore.
Autoritetet finlandeze po vazhdojnë të hetojnë shkakun e dëmtimit të C-Lion1, me synimin për të zbuluar nëse ishte një aksident apo veprim keqdashës.
Ndërprerja e C-Lion1 nuk është incidenti i parë i dëmtimit të infrastrukturës në Detin Baltik. Në tetor 2023, një tubacion gazi natyror midis Finlandës dhe Estonisë u dëmtua rëndë, gjë që i atribuohej një anijeje kontejnerësh kineze që tërhiqte spirancën e saj.
Në të njëjtën kohë, në vitin 2022 pati një shpërthim në tubacionet e gazit natyror Nord Stream që transportojnë gazin mes Rusisë dhe Gjermanisë, të cilin prokurorët gjermanë vazhdojnë ta hetojnë. Incidenti ka ndezur teori konspirative, me thashetheme të pakonfirmuara që fajësojnë Ukrainën, Rusinë apo edhe Shtetet e Bashkuara.
Për më tepër, të dielën, një kabllo tjetër nënujore 218 kilometra që lidh Lituaninë me ishullin suedez të Gotland u këput.
/a.r
