Pas telasheve me drejtësinë zvicerane për organizimin e Botërorit 2006, tashmë Franz Beckenbauer ka probleme serioze shëndetësore. Sipas gazetës gjermane Bild, fundjavën që kaloi, “Kaiseri” iu nënshtrua një operacioni bypass-i në zemër. Gjithsesi, Bild theksonte se nuk bëhej fjalë për një operacion të realizuar me urgjencë, por për një ndërhyrje kirurgjikale, e cila ishte përcaktuar të kryhej përpara disa javësh.
Beckenbauer u paraqit në klinikën në jug të Gjermanisë prej së premtes, vetëm një ditë pasi policia mësyu në banesën e tij në Salcburg, pas hetimit të nisur nga Prokuroria Federale Zvicerane, prej dyshimeve për pastrim parashë dhe mashtrim. Akuza e formuluar ndaj “Kaiserit” dhe tre përfaqësuesve të lartë të Komitetit Organizator të Kupës së Botës 2006 lidhet me evenimentin e 10 viteve më parë, për të cilin Gjermania akuzohet se fitoi të drejtën ta organizonte në mënyrë të dyshimtë.
Gazeta gjermane kujtonte gjithashtu se pas operacionit në zemër, Beckenbauer do të qëndrojë në spital nga një javë deri në 10 ditë. Kjo mund të bëjë që legjenda e futbollit gjerman, i cili ka fituar tituj botërorë si lojtar dhe drejtues, ta kalojë në spital ditëlindjen e tij të 71-të, të cilën do ta festojë më datë 11 shtator.
Supersport/d.i.
