Policia franceze ka kapur një raketahedhës në Lion, pas një aksioni të koordinuar në të gjithë vendin, sot në mëngjes herët.
Njësi të policisë anti-terror, të armatosura rëndë, kryen 168 sulme para agimit, në Tuluzë, Lion, Grenoble, Kale dhe dy rrethina të Parisit.
Ndër armët e kapura në Lion janë një raketahedhës, disa pisoleta, një kallashnikov dhe jelekë antiplumb.
Ministri i Brendshëm i Francës, Bernard Cazeneuve, tha se 104 persona janë vendosur në arrest shtëpie, ndërsa 23 të dyshuar janë ndaluar për t’u marrë në pyetje.
“Është vetëm fillimi, këto operacione do të vazhdojnë, përgjigjja e Republikës do të jetë e fortë, totale. Kush godet Republikën, do të goditet nga Republika”, tha ministri.
Një dëshmitar në Bobigny të Parisit tha për forcat anti-terror: “Janë me qindra, kudo. Mësyjnë shtëpitë, duke hedhur dyert përtokë, me thirrjet “policia, policia” dhe marrin me vete të dyshuarit”.
Policia bëri të ditur se aksionet në Bobigny janë të lidhura direkt me ngjarjet e së premtes.
