Franca përmbys edhe Spanjën dhe bën të vetën edicionin e dytë të Nations League. Në mitikun San Siro kënduan “gjelat” e Deschamps të cilët triumfuan 2-1 përballë Spanjës së Luis Enriques duke festuar në fund dhe duke ngritur lart për herë të parë në histori trofeun e Ligës së Kombeve.
“La Furia Roja” e dëshironte më shumë se Franca këtë trofe por dëshira e spanjollëve përballë klasit të francezëve nuk mjaftoi. Sfida që nisi me dorëzimin e trofeut nga portugezi Luis Figo që ishte edhe ambasador i finales, ishte disi e zbehtë në minutat e para. Pjesa e parë prodhoi pak raste për shënim me të dyja skuadrat që studiuan lojën e njëra-tjetrës.
Në fraksionin e dytë ishte Spanja që arriti të zhbllokonte shifrat me golin e sulmuesit Mikel Oyarzabal në minutën e 64-t pas topit që mori nga Busquets, por festa e spanjollëve zgjati vetëm dy minuta pasi në të 66-ën skenën e mori Karim Benzema që i shërbyer nga Mbappe barazoi shifrat.
Golin e fitores dhe të triumfit në këtë edicion të Nations League për skuadrën e Deschamps e realizoi njeriu i momentit Kylian Mbappe i cili u shpërbye nga milanisti Theo Hernandez. Dy nga futbollistët e përmbysjes së madhe të Francës ndaj Belgjikës në gjysmëfinale përmbysën edhe Spanjën me Francën që iu gëzua një suksesi të merituar.
/a.r
