Në një gjest simbolik dhe me vlerë të jashtëzakonshme kulturore, qyteti i Parisit ka vendosur të nderojë shkrimtarin e madh shqiptar Ismail Kadare me një pllakë përkujtimore në adresën 63 Boulevard Saint-Michel, vendi ku ai krijoi disa prej veprave më të njohura të letërsisë botërore.
Lajmin e ka përshëndetur Ministrja për Evropën dhe Punët e Jashtme, Elisa Spiropali, e cila në një reagim e quajti këtë akt “një falënderim të Francës për luftëtarin e paepur të Shqipërisë Europiane”.
Spiropali theksoi se në atë adresë do të përjetësohet kujtimi i një figure që “e ngriti Shqipen dhe Shqipërinë në lartësi dhe largësi të panjohura më parë”. Sipas saj, Kadare është shndërruar në një simbol që i dha dinjitet dhe krenari një kombi të vogël, por me shpirt të madh.
Postimi i plotë i Spiropalit:
Parisi i tha “Faleminderit” luftëtarit të paepur të Shqipërisë Europiane.
Në adresën 63 boulevard Saint-Michel 75005, ku Ismail Kadare shkroi perla të përbotshme dhe të tejkohshme, do të vendoset pllaka e Tij përkujtimore.
Në ato pak shkronja, do të kujtohet se Kadare e ngriti Shqipen dhe Shqipërinë në lartësi dhe largësi të panjohura më parë.
Do të mbushemi me krenari se edhe pse Ai i përket letërsisë botërore, ushqeu shpirtërisht e lartësoi moralisht popullin e Tij.
Do të përjetësohet nderi që Shqipëria dhe shqiptaria tek Ai dhe vepra e Tij gjetën formën më të lartë të vetvetes.
Do të na kujtohet se Kadare u shndërrua në pasaportën e Shqipërisë atëherë kur vetë Shqipëria ishte brenda kafazit të izolimit, e qëndroi në atë piedestal edhe kur qemë të përbuzur e të keqkuptuar, luftoi për ne, edhe kur ne luftonim kundër Tij.
Në atë pllakë do të gdhendet emri i kolosit kulturor, humanist, patriotik, që na dha gjithçka e nuk mori kurrë asgje.
Merci Paris! Merci à la France!
