Gjithçka ters për Shqipërinë. Sikur të mos mjaftonte ngatërrimi i himnit kombëtar, kombëtarja jonë anemike dhe pa asnjë ide loje mundet thellë nga Franca me rezultatin 4-1. Franca e tregon menjëherë se është kampionia e botës në fuqi. Minuta e 8-të dhe Koman i vidhet mbrojtjes shqiptare, me Roshin që humbet lojtarin dhe qendrat që mbajnë anësorin e Bajernit në lojë. Koman futet në zonë dhe thyen Strakoshën në shtyllën e parë, për kënaqësinë e tifozëve të tij.
Shqipëria e humbet pusullën. Nuk di të organizohet dhe shfaq limite të theksuara sa herë që “gjelat” shkelin pedalin e gazit. Kështu ndodh dhe në minutën e 27-të, me Olivie Zhiru që realizon golin e dytë, apo me aksionin që sjell penalltinë e minutës së 36-të, të cilën fatmirësisht e humbet Grizman, që përplas topin në traversë.
Mbyllet 2-0 pjesa e parë për të zotët e shtëpisë. Shqipëria në asnjë çast kërcënuese, ndërsa eksperimenti me Roshin në të majtë rezultoi i dështuar për Rejën, që u detyrua të nxirrte Hysajn në atë krah.
Shqipëria e nisi pjesën e dytë pa asnjë ndryshim lojtarësh apo formacioni. Franca po ashtu nuk ndryshoi asgjë nga formacioni fillestar.
Që në minutat e para, francezë e kërcënuan portën shqiptare në disa raste, dhe gjatë gjithë kohës e mbajtën mbrojtjen e kuqezinjve nën tension, derisa Coman gjen portën në minutën e 67, duke shënuar golin e tretë.
Pas një loje të cilën e mbajti gjithë kohën në epërsi, Franca shënon për herë të katërt, por Shqipëria përgjigjet shumë shpejt me golin e nderit.
Ikone, një debutues në këtë ndeshje, arrin shënojë golin e katërt për francezët.
Pak minuta më vonë, Cikalleshi mori një penallti dhe arrin të shënojë golin e nderit kundër kampionëve të botës.
