Dita e Verës 2020 e gjen vendin në “shtetrrethim” për shkak të rrezikut të koronavirusit, me masa të përforcuara që qeveria shqiptare ka ndërmarrë për të siguruar shëndetin dhe jetën e qytetarëve. Në një kohë kur numri i të prekurve në vendin tonë ka shkuar në 38, duket se është rritur edhe ndërgjegjësimi i kryeqytetasve krahasuar me një ditë më parë.
Ndryshe nga dita e djeshme, paraditja e së shtunës i ka gjetur thuajse bosh kodrat e Liqenit Artificial në Tiranë.
Në pamjet e siguruara nga “Javanews”, vihen re shëtitoret e zbrazura, dhe po kështu këndet e lodrave që ccdo ditë gumëzhinin nga zërat e të qeshurat e fëmijëve, tashmë duken të “heshtura”.
Tek tuk të sheh syri ndonjë qytetar, që pavarësisht apelit të qeveritarëve, ka vendosur të bëjë një shëtitje.
Ndërkohë që në sfond dëgjohet thirrja e lëshuar nga makinat e policisë bashkiake, drejtuar qytetarëve për të qëndruar në shtëpi.
Bashkia e Tiranës kishte organizuar një sërë aktivitetesh për Ditën e Verës, por që u anuluan për shkak të rrezikut të përhapjes së koronavirusit. /e.s/
