Këngëtarja më e suksesshme femër e Afganistanit arriti të largohet nga vendi me një avion amerikan. Aryana Sayeed, këngëtare dhe anëtare jurie të versioni afgan i emisionit “The Voice”, shkroi në rrjetet sociale se ishte mes personave fatlumë që kishin arritur të largoheshin të mërkurën nga vendi, ndërkohë që Talebanët shtrijnë pushtetin e tyre në Kabul.
“Jam shëndoshë e mirë dhe gjallë, pas disa netësh që nuk do t’i harroj kurrë. Arrita në Doha dhe po pres të arrij në Stamboll”, shkroi 36-vjeçarja për 1,3 milionë ndjekësit e saj në Instagram. Ndërsa më pas njoftoi se kishte mbërritur në Turqi. Sayeed gjithmonë ka mbështetur ushtrinë afgane në publik para rikthimit të Talebanëve në pushtet.
Megjithatë, figura të tjera të spikatura, si Salima Mazari, e cila ishte edhe guvernatorja e parë femër në Afganistan, nuk kanë pasur të njëjtin fat. Sipas raportimeve ajo është arrestuar nga Talebanët dhe mbëshgtetësit e saj thonë që edhe mund të ekzekutohet.
Pasi premtuan fillimisht se do të respektonin të drejtat e grave dhe do të lejonin që ato të ishin më të përfshira në jetën publike, gjithnjë në përputhje me ligjet islamike, Talebanët tani thonë që do të jenë klerikët e lartë ata që do të vendosin nëse gratë dhe vajzat do të mund të shkojnë në punë, apo në shkollë./m.j
