Ministrja e Mbrojtjes, Olta Xhaçka zhvilloi një vizitë 24 orëshe në Izmir, ku u takua me 21 efektivët e kontingjentit të 7-të të Forcës Detare, pjesë e operacionit të NATO-s në detin Egje, që prej janarit të këtij viti.
“I gjithë fokusi dhe përqendrimi ynë në këtë moment është tek edukimi dhe trajnimi edhe tek karriera e gjithësecilit prej jush, që për hir të së vërtetës, punoni mes kufizimeve dhe shumë sakrificave.
I gjithë ky kontribut i juaji është një trashëgimi shumë e rëndësishme që do t’i lihet brezave, duke ofruar siguri për vendin tonë dhe duke kontribuar për paqen përtej kufijve të vendit tonë.
Sa i takon trajtimit, jemi të ndërgjegjshëm që ka ende shumë për të përmirësuar.
Trajtimi nuk është i krahasueshëm me aleatët e tjerë dhe ndoshta nuk është as ai, që ne do të donim të ishte.
Dua t’ju siguroj që jemi maksimalisht të angazhuar edhe unë si ministre, por edhe ne si qeveri, që të sjellim një standard të ri në trajtimin tuaj jo vetëm njerëzor por edhe financiar.
Dhe sigurisht një standard të ri në Ministrinë e Mbrojtjes dhe Forcat e Armatosura për përparimin në karrierë, duke e bërë atë gjithnjë e më meritokratike.
Dua t’ju falenderoj gjithësecilin personalisht edhe shpresoj shumë që ky mision të përmbyllet me sukses nga ky kontingjent dhe të ktheheni shëndoshë e mirë pranë familjeve tuaja”, tha ministrja gjatë takimit me efektivët.
Ministrja e Mbrojtjes gjatë vizitës së saj në Izmir, zhvilloi një takim me zëvendëskomandantin e Forcës Tokësore të NATO-s gjenerallejtënant Paolo Ruggiero, i cili vlerësoi maksimalisht kontributin e Shqipërisë në misionet e NATO dhe BE.
Xhaçka u takua gjithashtu si edhe me zëvendësshefin e Shtabit për Operacionet në Komandën Detare të NATO-s, nënadmiral Jens Nemeyer, komandantin e Grupit Detar të Përhershëm të NATO-s Nr.2, kundëradmiral Mike Utley.
Ministrja e Xhaçka vizitoi anijen “Bayern”, e cila është anija në drejtim në task grupin numër 2, në misionin e NATO-s në detin Egje.
Që prej vitit 2016, 7 kontingjente dhe dy anije (Oriku dhe Butrinti) janë përfshirë në misionin e NATO-s në Egje. Misioni i anijes P-132 “Oriku” dhe P-134 Butrinti.
Roli i anijes “Butrinti” në këtë operacion, është kryerja e rikonicionit, monitorimi dhe vëzhgimi i kalimeve të paligjshme në zonën e aktivitetit/hapësirës detare në bashkëpunim me autoritetet detare të Greqisë, Turqisë dhe misionit të BE “Frontex”, për ndërprerjen e linjave të trafikut dhe emigracionit të paligjshëm në detin Egje, deri në një situatë të qëndrueshme. /ma.me
