Harrojini kështjellat e rërës! Një plazh tropikal në El Salvador po bëhet i famshëm për një vilë të braktisur në breg të detit. Vila misterioze, me kolona të stilit romak, po tërheq vëmendjen e kureshtarëve dhe eksploruesve të vendeve të braktisura.
E ndodhur në ujërat e vrullshme të Oqeanit Paqësor, ndërtesa këshillohet të vizitohet në mëngjes, pasi baticat gjatë pasdites, mbushin dhomat me ujë të kripur, duke e bërë atë një vend të rrezikshëm.
Prona gjysmë e fundosur është bërë e famshme së fundmi, por për një kohë të gjatë nuk njihej, e madje as nuk dihet qartë se pse vila u braktis në breg të plazhit. Sipas gazetës salvadoriane “La Prensa Grafica”, vendasit besojnë se ishte një hotel i quajtur hotel “Puerto Ventura”, i ndërtuar në mënyrë që turistët të ndihen më pranë detit.
Megjithatë, ata shkuan më larg seç duhet në bregun e detit. Disa vendas pohojnë se hoteli u braktis 25 vjet më parë, ndërsa të tjerët këmbëngulin se u braktis pasi uragani “Mitch” goditi vendin në vitin 1998.
Duket se vila nuk arriti të përballojë stuhinë dhe themelet e saj u dobësuan nga tërheqja e rërës. Pasi u braktis, ka spekulime se vila u bë një kishë, pasi ka një yll të Davidit në tavanin e një prej dhomave të katit përdhes.
