Ky është avioni me të cilin udhëton Kryeministri i Serbisë jashtë vendit. Një “jet” biznesi, i markës, Falcon 50, prodhim francez, i cili kushton 5,5 milionë dollarë. Paga e skuadriljes së pilotëve qeveritarë, pagesa për hangarin e aeroportit, mirëmbajtja periodike dhe kostot e karburantit sa herë që Kryeministri udhëton bën që fatura të shtohet me disa milionë euro të tjera në vit. Kjo, vetëm për udhëtimet e Kryeministrit, pjesa tjetër e qeverisë ka kosto shtesë.
Ky është avioni modern “Gulfstream V” i qeverisë greke, i blerë në vitin 2003 nga Kryeministri Simitis për 54 milionë dollarë në SHBA. Mirëmbajtja dhe udhëtimet shtojnë një faturë prej disa milionë eurosh në vit për transportin e Kryeministrit aktual, Tsipras.
Ky këtu është avioni qeveritar i Maqedonisë, një shtet me një buxhet më të ulët vjetor se Shqipëria. E megjithatë, “Learjet 60” ultramodern i blerë në vitin 2015 për udhëtimet e Kryeministrit ka kushtuar 4,4 milionë euro, plus një faturë vjetore prej pothuajse një milionë euro vetëm për mirëmbajtje dhe kosto parkimi.
E pabesueshme, por e vërtetë, edhe Mali i Zi me 600 mijë banorë ka një avion qeveritar, siç mund të shikoni në foton e mëposhtme. “Learjet 45”, me një dizenjo të brendshme VIP, ka kushtuar pak më shumë se 1 milionë dollarë dhe gjithashtu shpenzon disa qindra mijëra euro mirëmbajtje, karburant e paga për ta mbajtur në gjendje operacionale gjatë një viti.
E ndërsa të gjithë vendet fqinje kanë avionë qeveritarë, pasi mendojnë që Kryeministri përfaqëson imazhin e kombit dhe nuk është e denjë të udhëtojë në klasin e dytë të linjave të zakonshme, në Shqipëri debati qesharak bëhet rreth shumës që të gjithë institucionet planifikojnë të shpenzojnë gjatë një viti për bileta avioni.
Portalet e opozitës qarkulluan sot një lajm ku shkruhej se shifra e përbashkët prej rreth 800 mijë eurosh, që të gjithë institucionet marrë bashkë kanë lënë mënjanë për bileta gjatë vitit në vijim është një shifër tejet e madhe.
Një shkrim i tillë bazohet në arsyetimin e vetëm se një pjesë e këtyre parave do të keqpërdoren, kur këto para në fakt nuk janë lëvruar ende dhe mbi bazën e VKM 797, të 29 dhjetorit 2017, bëhet praktikisht e pamundur abuzimi me çmimet e biletave.
Duke ndjekur logjikën e artikullit të botuar ditën e sotme, shumë shpejt do të akuzohet Kryeministri dhe anëtarët e kabinetit të tij se përse udhëtojnë me avion, kur mund të shkojnë gjithsesi në vendet e tjera pa pagesë, hipur mbi një gomar?!/Lexo.al
