Ashtu siç pritej, këtë të enjte parlamentare, molla e sherrit mes maxhorancës dhe opozitës ka qenë ekstradimi i dyshimtë i Nezar Seitit, “financierit” të grupit kriminal të Habiljave.Qëndrimi kundër këtij vendimi në aulën e parlamentit i ka kushtuar një deputet Partisë Demokratike dhe kaq ka mjaftuar në seancë të hapej rruga për konfliktin, gjuhën e trupit madje deri tek ulërimat që Lulzim Basha i ka drejtuar deputetëve socialistë.
Trokitjet dhe rëniet me duar të tavolinave nga ana e deputetëve të opozitës, nuk e kanë ndalur kreun e Kuvendit Gramoz Ruçi që fjalën e deputetëve folës t’ua japë nga vendi, por në një moment tensioni ku një deputete e PD-së tentoi t’i hiqte mikrofonin një kolegu socialist, ky i fundit e ka shtyrë. Reagimi ka ardhur nga Basha, i cili ka nisur t’i bërtasë deputetit e më tutje ka patur një sherr verbal dhe me Taulant Ballën.
Një tjetër aspekt që ra në sy ishte “peshku i madh” që deputeti Ervin Salianji solli në ambientet e jashtme të gardës, një simbol për të treguar se e gjithë historia e kapjes së “kësaj race” kriminelësh është e pamundur nën qeverisjen e Ramës.
Së fundmi, kamerat kanë kapur dhe momentin kur Monika Kryemadhi i afrohet Sali Berishës dhe diskutojnë shkurtimisht për diçka, një komunikim që e shohim për herë të parë publikisht.
Më poshtë mund të gjeni një sërë fotosh pikante, të kapura nga fotografi Agim Rama./Gazeta Express
